0
50
سؤال مش بعيد يكون عدى على أذهان تقريبا كل المتجوزين: هو ايه اللي جراله بعد الجواز؟ هي ليه بقت واحدة تانية بعد الجواز!!
إستفسار طبيعي و في محله جدا, بعض المتجوزين قدروا يجاوبوا عليه, و بعضهم من كتر ماحاول يجاوب عليه و فشل قالك خلاص, اللي حصل حصل, أدينا على الأقل شوفنالنا يومين حلوين قبل الجواز, و البعض التالت لا عرف يلاقي الإجابة و لا قدر حتى يطنش ففركش الليلة و قالك مش لاعب!
اللي أنا لاحظته من خلال عملي مع المتجوزين إن السؤال فعلا قائم و في محله جدا! فعلا الإتنين بيتسألوا: هو ليه حصل إختلاف في الشخصية بعد الجواز؟ أمال مين الشخص اللي أنا إتعرفت عليه كل السنين اللي فاتت دي؟ ده إحنا فضلنا سنة مخطوبين, كنا نعمل إيه تاني أكتر من كده عشان نتعرف على بعض؟ و بعدين ماهو إحنا قضينا شهر عسل تحفة و كانت رحلة مايحلمش بيها أي إتنين تانيين, أمال إيه بس اللي حصل؟
لا المشكلة ماكاتش نهائي في طول أو قصر فترة الخطوبة, ولا طول أو قصر فترة كتب الكتاب, ولا المشكلة خالص إنكو قضيتو شهر عسل في البلد الفلاني و لا المكان العلاني. ولا المشكلة نهائي اللي بتتوهم بيه بعض البنات إنها كانت أصلا جوازة صالونات, كله منها طنط عفاف, كان لازم تجيبلي إبن أختها و يعجب أهلي؟ ماكنت إتعرفت على حد زميلي في الجامعة!! لأ خالص, مش هي دي المشكلة!
أمال إيه؟ الفكرة كلها إننا كبني آدمين طبيعيين عشان نتكلم و نتفاهم بنستعمل اللغة! من وإحنا أطفال أهالينا علمونا نتكلم عشان نعرف نعبر عن نفسنا, فطلعنا بنتكلم زيهم إحنا وأخواتنا. و صارت اللغة اللي أهالينا علموهالنا هي اللغة الأم, اللي تعتبر لغتنا الأولى اللي بنجيدها أحسن من أي لغة تانية و نقدر نعبر بيها أحسن من أي لغة تانية! بالتالي لما جينا بعد كده نتعلم لغات إضافية, صارت اللغات الإضافية تستخدم لخدمات أقل أهمية من اللغة الأم: ممكن في الدراسة, في الشغل…و هكذا, لكن لما حآجي أتكلم و أعبر عن نفسي مفيش أحسن من لغتي الأصليه اللي أعبر بيها عن نفسي و أوضح بيها عن اللي جوايا. و عشان كده لو أنا باتكلم عربي كويس أوي و باعبر بيه عن نفسي, ممكن لو قابلت واحد طالياني ماعرفش أوي أتواصل معاه, لأني مش باعرف إيطالي! ساعتها حاضطر أدور على مترجم عشان أعرف أتفاهم مع الطلياني, يا إما ممكن نحاول نقضيها إشارات و رسومات و رموز عشان نعرف نوصل لبعض المعلومة و نحاول نتفاهم. المدهش في الموضوع إني لاقيت إن الأزواج اللي تصوروا إنهم بيحبوا بعض و بيفهموا بعض طلعوا بيتكلموا لغات مختلفة! كل واحد فيهم عنده لغة, بيجيدها و قد لايجيد غيرها, و بالتالي لما بيتكلم بلغته بس مراته مابتفهمهوش. و هي لما بتعبر عن نفسها أو بتطلب حاجة زوجها مابيفهمهاش.
ييجي الزوج يقل: والله باقولها إني باحبها و إنها أحلى واحدة في عيني و إني ماقدرش أستغنى عنها, مش فاهم هي ليه فاكرة إني مابحبهاش! و الزوجة تييجي تقول: والله باطبخله كل يوم أكلة و باكويله هدومه و مظبطاله دولابه و لايعرف يلاقي حاجته منغيري, مش فاهمة أعمله إيه تاني عشان يعرف إني باحبه؟؟
إيه اللي حاصل؟ كل واحد من دول بيتكلم بلغة معينة وحيدة هي اللي يعرفها عشان يعبر بيها عن حبه. و التاني مش فاهم اللغة دي ولا مجمعها و غالبا حيحتاج مترجم قريب عشان يفهمه! دكتور جاري شابمان, مستشار علاقات زوجية أمريكي, كتب كتاب إسمه: لغات الحب الخمسة. الكتاب ده مضمونه إن كل إنسان بيتكلم بلغة حب معينة يعرفها و هي دي اللي بيعبر بيها عن الحب اللي بيحس بيه و الحب اللي بيديه. دكتور شابمان حصر لغات الحب في خمس لغات: كلمات الإستحسان, الخدمات, وقت قيم, الهدايا, الملامسة. في الحالتين اللي عندنا هنا مثلا حنلاقي إن الزوج اللي بيقعد يقول كلام حلو لمراته عشان يعبر لها عن حبه بيتكلم لغة كلمات الإستحسان. و حنلاقي الزوجة اللي بتعمل لزوجها اللي تقدر عليه عشان ترضيه بتتكلم بلغة حب إسمها: الخدمات. السؤال المهم هنا هو مين قال للزوج إن مراتك فاهمة اللي أنت بتحاول توصلهولها؟ مايمكن هي كل اللي نفسها فيه إنك تقضي معاها و تخصص لها ولو ساعة في الإسبوع ليها هي بس؟؟ زي مابتعرف تخصص عدد لا بأس منه من الساعات لأصحابك؟ و مين قال للزوجة إن زوجك بيحب الأكل أصلا (على فكرة المثل بتاع أقصر طريق إلى قلب الرجل هو معدته ده مثل فاشل و هابط و معظم الرجالة بتحاول النهاردة تحافظ على لياقتها و تقلل أكل). ما يمكن كل اللي زوجك نفسه فيه هو تعبيرك عن حبك ليه بالملامسة؟ للأسف غالبا حتلاقوا إن ولا الزوج فاهم زوجته ولا الزوجة فاهمة زوجها و ياعيني كل واحد فيهم قاعد بينفخ بينفخ, بس الظاهر إنه مش واخد باله إن القربة مخرومة. المهم إننا لو قدرنا نقرا الكتاب ده أو لو حتى إستغلينا أي فرصة و قدرنا نقعد مع أزواجنا و نحاول نفهم منهم هم لغتهم إيه عشان نتكلمها, أكيد ده حيوفر كتير و حيسهل كتير التواصل و التقارب بين الأزواج. و بدل ما كل واحد فيهم بيتكلم لغة شكل و قاعدين بس طول النهار بيشتكوا إنهم مش فاهمين بعض, يمكن ساعنها لما يدوروا على لغات مشتركة, يمكن ساعنها يبطلوا رموز و إشارات و يفضلوا هم هم الإتنين اللي إتفقوا يعيشوا لبعض و مع بعض مادام في العمر بقية!!
فتكم بعافية
سارة سليمان
مدربة علاقات زوجية معتمدة.
Certified Relationship Coach
