0
1
.
زمان وانا مراهقة (مش زمان اوي يعني) كنت باستغرب الشباب اصحاب صديقاتي إللي كانوا مابيفوتوش مناسبة إلا وإديها في ورد و هدايا و فلان جابلي وفلان عمللي…كنت باحس: إيه التمثيل ده، هو في أصلا راجل بيفهم في الحاجات دي؟ هو في اصلا راجل بيعرف يشنكل قلب بنت و يعبرلها عن مشاعره تجاهها؟ هو في اصلا راجل رومانسي؟
ولزمت أنا هذا الفكر حتى مرحلة الجامعة لما كانت زميلاتي إللي بتتخطب وإللي بيتكتب كتابها و كنت باشوف برضه ممارسات مماثلة من شركائهم إشي ورد و إشي هدايا…وبارضه كنت مقتننعة في قرارة نفسي إن ﻷ مفيش حاجة إسمها راجل رومانسي…الرومانسية دي في الستات بس…الراجل راجل و آخره واحد صاحبه بيقولله ياجدع إتلحلح وخد معاك ورد ولا إزازة برفان وانت رايح تزورها فبيسمع كلامه….
والحمد لله إتجوزت و….. مش عايزة أقول و تغيرت نظرتي لهذه الفكرة والكلام الهابط ده…ولا عايزة اقول تأكدت عندي الفكرة و ترسخت إن الرأجل فعلللاااا مش رومانسي…ولله الحمد والمنة…لكن عايزة اقول إن فعلا في فرق بين رؤية الست للرومانسية ورؤية الراجل وفهمه لهذا المصطلح المعقد. اولا لازم نفهم إن الرومانسية دي مصطلح غربي “هبط” علينا من الأفلام و المسلسلات الغربية وحتى مالوش نظير في اللغة العربية. الرومانسية تاريخيا حتى ماحدش يعرف هي من روما ولا فرنسا ولا أسبانيا. المهم ان الرومانسية حالة مزاجية وشعور رقيق مرتبط بالحب بطريقة نسبية و بتتفاوت معايرها و نسبها من شخص للتاني..ناهيك طبعا عن الفرق في نسبتها بين الراجل والست. مش بنقول اطلاااقا ان الرومانسية ماكانتش موجودة عند العرب وقتها, بالعكس تماما, في العصور الجاهلية كان شعراء الحب والغزل أمثال عنترة بن شداد و امرؤ القيس أمراء الدلع والمعاكسات (بلغة النهاردة يعني). وزي ماقلت, بيتفاوت الأحساس ده بين شخص والتاني و بالتأكيد بيتفاوت بشدة بين الراجل و الست!!..
ولان الست بطبيعتها كأنثى كائن حالم و رقيق و بتتأثر بسرعة فتراها اكثر نعومة و اكثر إستيعابا و تقبلا للفكرة، فكرة الرومانسية. وحتى الستات بينهم و بين بعض في منهم رومانسيتها فياضة لا حدود لها…وفي منهم يعني، على قد حالهم..
يعني أنا الصراحة ماكذبش عليكو مافهمتش لما واحدة صاحبتي شافت صورة لبرج إيفل و هو منور بالليل والمنظر من الفراندة اللي بيطل على البرج و كتبت إنها قلبها حيقف من المنظر وإنها حتعيط. ماكذبش عليكو أعدت اكبر في الصورة و أحاول أدور هو إيه اللي عاجبها فيها: الستارة؟ يمكن الكراسي؟ طب العشا في البلكونة طيب؟ مافهمتش….قلت يا واد طنش خاااااالص….مش مهم انا أفهم…يمكن ان الصورة دي كسبت في مسابقة عجائب الدنيا السبعة مثلا أو في مسابقة أجمل أعمال هندسية من القرن اللي فات..الله أعلم… ففهمت ساعتها إن اللي عاجبها وارتبط في ذهنها المعنى الرومانسي والشعور اللطيف اللي جالها لما شافت الصورة الباريسية الساحرة. و كوني انا ماشفتش او مافهمتش ده معناه إن الناس متفواتين و مختلفين في أمور الرومانسية و تفهمها ة استيعابها. إذا بالتالي كان إستنتاجي, إذا كانت النسوة ذوات الحس المهف و المشاعر الفياضة بتتفاوت فيتفهم و الشعور بالرومانسية, إذا فمن الأولى ان الرجالة بأه ميكونوش رومانسيين خالص! لكن إللي اكيد و حقيقي وطلع فعلا وارد : إن ايوه في رجالة رومانسية. في رجالة بتتأثر من الحاجات اللطيف الصغننة دي: هدية, وردة, عشا على ضوء الشموع, كلام حلو…أي نعم هم مش كتير، يعني بتاع تلاتة كده في كل جيل…زي مثلا نزار قباني و….. وبس….
المهم إنه في رجالة رومانسية, ..و مش من اﻹنصاف ابدا إننا ننكر وجودهم. الراجل الرومانسي بيقول كلام حب, بيتأثر بالمواقف العاطفية, بيقدر الجمال, بييعبر عن تقديره بهدية, بكلمات إستحسان, بأفعال مؤثرة وهكذا. ممكن نقول إن الرومانسية بتتفاوت من ست للتانية فبالتالي هي بتتفاوت من راجل للتاني, وبقدر تفاوتها يكون قدر أهميتها عنده. يعني ممكن راجل يكون رومانسي و مهم بالنسباله التعبير عن الرومانسية و انه يعيشها, و في راجل ممكن يحس إنها كماليات و حاجات ثانوية كده يكفي اننا نسمع عنها. طيب الشخص ده نقول عليه إيه؟ قفل ولوح و مش ممكن التعايش معاه؟ لأ لازم نفرق بين حاجتين مهمين جدا:
قد يكون زوجك مش رومانسي ولا عاطفي ولا يملك جوامع كلمات قاموس الحب….لكن ده لا يعني إطلااااااقا إنه مش بيحبك!!!! خللي بالك: في فرق بين الرومانسية والحب. الرومانسية إحساس, أسلوب تستخدمه غالبا المرأه للتعبير او لتأكيد الحب, كما يستخدمه بعض الرجال. لكن الحب شعور عميق موجود سواء تم التعبير عنه أو لأ. غير إن التعبير عنه بيتفاوت ممكن يبان وممكن مايبانش, اكررها: مش بانكر إنه فيه راجل رومانسي…ﻷ ممكن يكون فيه..لكن مش ده اﻷغلب. و ممكن يكون الزوج فقط لا يمتلك فن و أدوات التعبير عن هذا الحب. المهم إنك تكوني واقعية وماتتوقعيش من زوجك ماليس فيه وما لايجيده. سيبيه يعبر لك عن حبه بطريقته.. مش بطريقتك إنتي و شجعي و إحترمي فيه كل محاولة و كل مرة بيحاول يعبرلك فيها عن حبه و تقديره لكي…سواء بطريقة إنتي بتحبيها او ﻷ. علميه إزاي يحبك.. وريه معنى الحب بالنسبة لك, عبريله عن إحتياجاتك و أحلامك و أصبري عليه عشان يفهمها و ينفذها. و تذكري:
التوقعات – الواقع = خيال
[اقرئي أيضا: كيف تحتفظين بمشاعر الحب مع شريك حياتك رغم مرور الوقت]
[اقرئي أيضا: سارة سليمان تكتب : الاحترام]
[اقرئي أيضا: الحياة الزوجية بين العند و المرونة]
فتكم بعافية
سارة محمود سليمان
ميتا كوتش و مدربة علاقات زوجية
photo credit: bigphoto
