share
1
81
181جني بنوتة جميلة عندها 7 سنين جت لمامتها في يوم و قالتلها “ماما انا قررت اتحجب!”
طبعا كأي أم مامتها بدأت تفكر يا تري ايه الصح, اتكلمت معاها كتير ان لسة الحجاب مش لازم تلبسه دلوقتي لكن هي مصممة تلبسه. في النهاية مامتها قررت انها تسيبها تخوض التجربة و لبست جني الحجاب.
كل واحدة هتقرأ الكلام اللي فوق هيكون ليها رأي مختلف,فيه اللي هتوافق الام في قرارها و تشوف ان ده الصح, و فيه اللي هتعترض و تشوف ان البنت لسة صغيرة و هتتعقد و تكره عيشتها.
أنا هنا مش هتكلم علي هل قرار البنت و مامتها صح ولا لا لكن كلامي هيكون موجه للناس اللي بتقرر تدخل في حياة البنت و مامتها و لمجرد انها شايفة ان قرارهم غلط يبقي لازم يغيروه حتي لو ده هيأثر علي البنت!
هل الاحسن للبنت انها تقرر قرار و نتكلم معاها و تبقي عارفة عواقبه و تجرب بنفسها و لا الاحسن اننا نقرر لها قرارها؟ احنا للاسف بنحط معايير معينة للسعادة و ازاي الاطفال تكون سعيدة في حياتها و من غير المعايير ده اللي احنا حطيناها بنفسنا بنقرر للناس انهم مش مبسوطين و نقرر لهم المفروض يعملو ايه و يتصرفو ازاي و النتيجة اننا بنطلع جيل كامل مش عارف ياخد قراره لانه ببساطة دايما حد بيقررله أو لازم يوافق علي قراره. انا متفهمة جدا ان خطوة زي ده صعبة علي البنت و الاهل بيبقو فعلا خايفين علي بنتهم لاسباب كتير لكن السؤال ليه نصعب التجربة اكتر؟
كلامي مش معناه اننا نسيب أولادنا علي راحتهم من غير توجيه لكن معناه اننا نسمحلهم يعيشو التجربة و يغلطو و يتعلمو و يعرفو بنفسهم ايه الصح و ايه الغلط, ايه ينفع و ايه مينفعش, يقدرو يتحملو عواقب قراراتهم من غير لوم و توبيخ من اللي حواليهم.
كلامي برده مش معناه اننا مننصحش بعض أوكل أو اننا منقولش رأينا ايه صح و ايه غلط في وجهة نظرنا, لكن في النهاية لازم ندي كل واحد حرية القرار,احنا ربنا خلقنا مختلفين فايه المشكلة اما نسيب المختلف يعيش زي ما هو عايز مش زي ما احنا عايزين؟ نسيب كل واحد يقرر ايه اللي يصلح ليه و ايه اللي أحسن بالنسبة ليه و نديه فرصة انه يغلط و يكفيه تحمل عواقب قراراته مش لازم يتحمل عواقب قراراته و كمان رفض الناس ليه!
و أخيرا زي ما المثل المصري المعروف بيقول “لولا اختلاف الاذواق لبارت السلع” أمنيتي اننا نعيش في مجتمع متقبل بعض و متقبل اختلافات بعض لاننا في النهاية أصلا مخلوقين مختلفين.
أمل فاروق
مدرب معتمدة في التربية الايجابية
Khadija
جميلة يا أمل ما شاء الله. احنا كتير فعلا بنقع في غلط الحكم ع الناس من بره و بنحط قواعد عامة في الحياة عايزين نطبقها ع الناس كلهم. زي “الأطفال اللي بيتحجبوا مش بيعيشوا طفولتهم” و بنطبقه على اي طفل مهما كان. و ده مرض في مجتمعنا للأسف و اوحش حاجة زي ما قلتي اننا بنحشر نفسنا في حياة ااناس التانية.
فيه مثل بيستفزني اوي “كل اللي يعجبك و البس اللي يعجب الناس”. اللبس ده حاجة بتعبر عن الشخصية اللي لابساه و عن معتقداتها و طريقتها في الحياة. غلط اوي الواحد يلغي هويته و اعتقاده تماما و يلبس اللي يعجب الناس.
eman
جميل يا امل حلو اني انمي creativity عند الأطفال في كل الجوانب خاصة الديني.. عجبتني فكرة يخوض التجربة قبل سن التكليف اذا رغب و شايفة سن 7 كويس لنقاش ناجح مفهوم بين الطفلة و الام.. أحب الحرية و اقدرها كثيراً و احترم الاختلاف لأقصى درجة.. ربنا ينفع بيكي حبيبتي
noha
تسلمى يا امل كلام كل بيلمس وتر جوا كتير مننا وياريت نتعلم ثقافة احترام الاختلاف مع الاخرين سواء الفكرية او الفروق الشخصية فى التصرفات وان اللى يناسبنى مش بالضرورة يكون مناسب لغيرى لان كلنا بتأثر فينا ظروف مختلفة بتشكل شخصيتنا وتفكيرنا وتصرفتنا حتى الاخوات بتكون شخصياتهم مختلفة مع ان اللى بيربى ام واحدة واب واحد
radwa
كلامك صح عجبتنى اوى ان ياريت نسيب الشخص يتحمل عواقب تجربته من غير لوم او توبيخ عشان ده فعلا بيكون كافى مش ناقص لوم الناس