رمضان و الفيس بوك

 

كنت بقرا مقالة بتتكلم عن الكسل و كان الكاتب بيتكلم في جزء منها عن الغفلة. قالك لما تبقي قاعد كدة بتعمل حاجه و حد يسألك انت بتعمل ايه…لو رديت و قلته “و لا حاجه” أهو هو ده بالظبط تعريف الغفلة. من الحاجات الي ينطبق عليها التعريف ده الfacebook. فعلا كتير تبقي قاعدة عليه يجي جوزك يقولك بتعملي ايه تلاقي الرد الأوتوماتيكي “ولا حاجه”!

اذا قاعدة الفيس بوك عادة تعتبر نوع من الغفلة ده غير انها بتسحب من تركيزك خصوصا لو بدأتي بيها يومك هتلاقي نفسك معندكيش همة لقراءة القران و العبادات.

طب الحل إيه؟ ازاي نخرج من غفلة الفيس بوك من باب الإستعداد لرمضان و في نفس الوقت منحسش بإنقطاع عن الأصحاب و الأخبار؟ طيب في شواية مقتراحات ممكن تساعدك منها:

• اختاري موقع أو اتنين بالكتير جدا تتصفحيهم كل يوم عشان تتابعي الأخبار عشان متضطريش تدخلي علي الفيس بوك بحجة متابعة الأخبار .
• وحدي وسيلة الإتصال مع أصحابك مش معقول كل يوم نقعد نلف حوالين نفسنا فيس بوك و واتس آب و انستجرام و تليجرام و غيره!…و ممكن مثلا تغيري الcover photo بتاعتك بصورة توضح انك واخدة أجازه من الفيس بوك لحد العيد و الي محتاجك يتواصل معاكي ممكن يلاقيكي علي الwhat’s app مثلا و تبقي هي دي طريقة التواصل الوحيدة.
• حددي مواعيد محددة لإستخدام الsocial media بشكل عام, يعني مينفعش تجري علي الموبيل أول أما تصحي الصبح و لا ينفع يبقي أخر حاجة بالليل و كمان مينفعش تبقي مشغولة في يومك بس بتعرفي تلاقي وقت من تحت “طقاطيق الأرض” عشان تدخلي علي الفيس بوك أو الsocial media بشكل عام, حددي معاد ثابت يوميا هو ده الي بتدخلي فيه و يا ريت يكون بعد ما تخلصي جزء من الشغل الي عليكي سواء في بيتك او في وظيفتك.
• متعتبريش ان الفيس بوك أو الsocial media وسيلة ترفيه لا دي “غفلة” يعني الي هو لا منك استريحتي شواية و لا منك عملتي حاجة مفيدة.
• لو بتحبي تقرأي مثلا يبقي خاليكي مجهزة كتابك معاك في شنطتك عشان أول أما تفضي في أي مكان تطلعيه و تقرأيه مش تدخلي علي الفيس بوك. شوفي إيه هي هوايتك و لو تقدري تبقي معاكي في كل حته بحيث إنك “تسلي” نفسك فعلا بحاجه مفيدة.
• حاولي تجربي تخرجي المشاوير البسيطة من غير ما تاخدي معاكي الموبيل. و لو أخدتيه مفيش داعي تطلعيه برة الشنطة و انتي في العربية لا خاليه جوه الشنطة عشان ميبقاش في متناول إيدك و انتِ سايقة!
• لازم من باب الإستعداد لرمضان تحاولي إنه يكون في يوم أو اتنين في الإسبوع من غير انترنت خالص أو علي الأقل من غير social media.
• ادعي ربنا يباركلك في وقتك و افتكري كلمة الصالحين “ضياع الوقت من المقت”

 

فريق عمل مج لاتيه.