أنا إللي كانوا مسَمّييني عايقة ورايقة.. أنا إللي كنت بقفِّل ٩ ساعات نوم متواصل.. أنا إللي كنت بستَحَمّى في ساعة ونُصّ، ويا ويلُه إللي يخَبَّط على باب الحَمّام.. أنا إللي كنت بروح للكوافير كل أسبوع، وبَغَيَّر لون شَعْري كل شهرين.. أنا إللي كانت مكالمتي لصاحبتي مُدِّتها ساعتين.. كان مستحيل حد يشوفني بنفس اللِبْس مَرّتين.. كنت لو طِلِعْلي حَبّاية في وِشّي ماخرُجش من البيت ٣ أيام.. كنت مثال للرِقّة، وبتكَلِّم بالهَمْس.. كنت باخُد المُرَتَّب من هنا، وأشتري بيه كُلُّه لِبْس وميك أب من هنا.. كنت بروح الچيم كل يوم.. كنت لو زِدْت كيلو، أُضْرِب عن الطعام لغاية ما أَخِسّ.. لو معزومة على فرح بحَضَّر هَلْبِس إيه قبلها بشهرين؟..

ماينفعش يعَدّي أسبوع من غير ما أخرج مع صحباتي، ونقَضَّي اليوم كُلُّه مع بعض.. بَبُصْ في المراية مش أقل من ٢٠ مَرّة في اليوم.. المَبْرَد والمُلْقاط أصدقائي المُقَرَّبين.. أرمي لِبْسي إللي محتاج يتغِسِلْ عَ الكُرسي، يرجعلي تاني يوم مغسول ومكوي.. بدخُل المطبخ بس عشان أشرب مَيّه.. علاقتي بالطَبَقْ إللي باكُل فيه بتنتهي مع آخر معلقة.. فيه أجهزة في البيت ماعرفش بتشتغل إزّاي؟ زي الغَسّالة والمَكْنَسة، لكن السيشوار والبيبي ليس كنت خبرة فيهم.. كنت، وكنت، وكنت…

……….

أنا إللي بصْحى كل ساعتين.. لو نِمْت ٤ ساعات متواصل بعمل لولولوليييي فرح.. أنا إللي بستَحَمّى في ٣ دقائق على أصوات خَبْط وترزيع عَ الباب.. أنا إللي بَسَرَّح شَعْري لمّا يطلع عَ الجيران، وعلاقتي بالصَبْغة هي إعلان هند صبري.. أنا إللي لو عرفت أَرُد على صاحبتي لازم المكالمة تتقطع في النُصّ، وأقولَّها: “نتكَلِّم تاني”، وعمرنا ما بنتكَلِّم تاني.. أنا إللي مش فاكرة اشتريت لِبْس آخر مَرّة إمتى؟ يمكن في العيد الصُغَيَّر! بَبُصْ في المراية مَرّة واحدة في اليوم، وأنا بغسل سِناني ( ده لو افتكرت أغسلها).. سمعت إن فيه جيران في الشارع إللي ورا إللي ورانا لسّه ماسمعوش صوتي وأنا بذاكر لبنتي.. كرهت الميك أب، وبطَّلت أستعمله لمّا عرفت إنه مُضِرْ بالبشرة.. ؛)
بمارس التمارين الرياضيّة كل يوم؛ تمرين الكَنْس، تمرين المَسْح، تمرين نَشْر الغسيل وتطبيقه، وطبعًا التمرين الأشهر على الإطلاق إللي بيقَوّي عضلات الفَكّ.. عرفتوه؟ برافو، تمرين أكل الأخضر واليابس.. طبعًا مش محتاجة أقول إني بطَّلت أحضر أفراح بعد إللي حَصَلّي آخر مَرّة، لمّا ابني عمل بيبّي عَ الكُرسي بتاع العروسة.. ودلوقتي خروجاتي الأساسيّة هي تمارين ولادي.. فيه مُمْتَلَكات ضاعت مِنّي تحت الأنقاض، وبطَّلت أدوَّر عليها زي؛ المَبْرَد والمُلْقاط والمراية إللي بتكَبَّر دي.. عارفينها؟ وفيه حاجات في البيت علاقتي بقت وطيدة بيها لدرجة إنها أوِّل ما تشوفني، تاخُدني بالحُضْن زي حوض المطبخ بمواعينه..

أنا صحيح حياتي اتغَيَّرت ١٨٠ درجة، بس أهم وأحلى حاجة حصلِتلي في حياتي هي إني بقيت أُم.. وده إللي بيدّيني القوّة إني أكَمِّل، وبيدّيني أمل في بُكْره، وبنسى أي تعب وإرهاق مع ابتسامة من ولادي أو حُضْن بحِسّ معاه إني حضنت الدنيا كُلّها.. كمان التغيير ده خَلّاني أحِسّ بقيمة أقل الأشياء، وأتبسط بيها أوي زي إني أعمل شَعْري، أو أشتري بلوزة جديدة، أو إني أصْحى الصُبْح ألاقي جوزي نَشَر الغسيل، أو إن بنتي تقولّي: “بحِبِّك”، أو إني أشرب مَجّ اللاتيه بتاعي وهو سُخْن.

ممكن تكوني مش بتعيشي أجمل أيامِك، بس تأكَّدي إن فيه حاجات جميلة في كل يوم بتعيشيه.. اتعَوِّدي إنك تركِّزي عَ الحاجات الجميلة دي حتى لو كانت صُغَيَّرة وقتها.. هَتْحِسّي بالرضا والسعادة.

نسرين عبد الوهّاب

مواضيع أخري اخترناها لك:

من انهاردة هبطل أشتكي

أسطورة المرأة الخارقة

حتي لا يضيع عمرك!

photo credit: Bigstock