بتفكري تجيبي ايه هدية لابنك السنة دي؟؟ ليه متفكريش في حاجة تبقى هديه ليه طول العمر؟؟ من واحنا صغيرين واحنا دايما بنردد المقولة المشهورة أن أفضل صديق للإنسان هو الكتاب.
العلاقة الحميمة دي بين الكتاب والإنسان بتبقى أفضل لما بتبدأ من سن صغير، طبعا في ظل التقدم الهايل اللي احنا فيه ده أصبح الأطفال مفتونين أكتر بألعاب الفيديو والكتب الإلكترونية .. و بالتالي فكرة بناء مكتبة خاصة لطفلك تبدو فكرة مملة وصعبة شوية، بس الحقيقة هي تستاهل كل العناء و الجهد.
أكتر مشكلة بتواجه الأطفال في أولى مراحل المدرسة هي قلة التركيز و تشتت الانتباه اللي بيتسببوا في قلة التحصيل الدراسي، وبناء مكتبة لطفلك واستثمار وقت في ده هيساعدك كتير في التغلب علي المشاكل دي، لأن طفلك هيتعلم ازاي يركز ويدي اعتبار للوقت اللي بيقضيه جوه مكتبته وغير كده كمان طفلك ممكن يستخدم كل نشاطة والوقت الفاضي ومصروفه عشان يزود كتب في مكتبته وده معناه أنه هيستغل كل إمكانياته بطريقة إيجابية.
و عشانتجهزي مكتبة في البيت بجد مش حاجة صعبة خالص ، الموضوع كله محتاج أنك تبقي عندك عزيمة في الموضوع ده و ممكن تتبعي النصايح دي:
- اختاري مكان هادئ ودي أهم نقطة في استكشاف المكان اللي هتعملي فيها المكتبة، مش لازم بيتك يبقى كبير ولا حاجة ممكن حتة صغيرة في البيت مش مستغلة تبقى مكان هايل جدا ، أو ممكن حتى تعملي مكتبة صغيرة جدا في أوضة ابنك مكونه من رف أو اتنين حاجه بسيطة مش لازم مكتبة كبيرة.
- زيني المكان بس متصرفيش كتير على المكتبة خاصة في بادئ الأمر .. مكتب ، شوية كتب منسقيين ، سجاده تغطي بيها الأرض يكون لونها فاتح ومبهج، وشوية مخدات تعملي بيهم قاعدة ظريفة هو كل ما تحتاجين ،ممكن تجيبي المكتب وأرفف الكتب من أي مكان بيبع أثاث مستعمل في منطقتك،لو محتاجة حاجة أرخص .. خلي إبداعك يسوقك لفكرة تطلعي بيها مكتبة من الأشياء غير المستعملة في البيت ، وممكن تلاقي مواقع كتير تساعدك في بناء مكتبة لطفلك.
- أضيفي الألوان المبهجة للمكتبة، خلي المكتبة نقطة مركزية سحرية بالنسبة لطفلك، لصق صور لشخصيات قصة ابنك بيحبها فكرة جيدة.
- استمري في جعل المكتبة منطقة نشطة دائما متفتكريش أن بمجرد أنك عملتي المكتبة كده دورك انتهى ، ده انتي عملتي كل ده لغرس حب القراءة في ابنك،استغلي الوقت مع ابنك في المكتبة، خليه يعمل واجباته المدرسية فيها،وممكن تقعدوا تقروا مع بعض أي قصة بتمعن ،ترحبي بأصحاب ابنك في المكتبة وتقرأوا حاجة مع بعض.
- اذهبي للتسوق مع ابنك والبحث عن الكتب التي يحبها بأي سعر كل فترة أسبوعين مثلا أو شهر، المكتبة بالنسبة لطفلك لازم تبقى زي الربيع المبهج .. مش كئيبة ولا متعبة.
فريق عمل مج لاتيه
Photo credit: Bigstock
اترك تعليقاً
يجب أنت تكون مسجل الدخول لتضيف تعليقاً.