الاكتئاب!
كتير مننا ساعات بيدخل في مود اكتئاب غير مفهوم و بنبقي مش عارفين إزاي نخرج منه… في بعض الأفكار البسيطة و المتجربة الي بتساعدك علي إنك تتغلبي علي المود السلبي ده و تشعري براحة نفسية جربي طريقة أو ممكن تحتاجي كذا طريقة من دول مع بعض علي حسب مستوي الإكتئاب!
[اقرئي أيضا : رنا رشيد تكتب : طريق السعادة المختصر]
- كلي قطعة شكولاتة كبيرة ! جدا كمان…محدش يسألني إيه السبب و هل هناك أسباب علمية أو لا بس الشكولاته من الحاجات الجميلة في حياتنا الي بتدخل السرور علي قلب الواحد و افتكري و انتي ماسكة قطة الشكولاتة الكبيرة دي و قاعده تاكليها في صمت لو حد سألك قولي: أنا باكل عشان أنسي!
- كلمي حد من أصحابك في التليفون و بلااااااااااااااااااااااااااش الفيس بوك أو الواتس آب لأن التجربة أثبتت أنهم لا بيخرجوا من مود الإكتئاب و لا بيفرفشوا الواحد بالعكس ده الواحد ساعات بيبقي صاحي رايق و فايق و يغلط و يدخل علي الفيس بوك يلاقي نفسه لبس في بوست و لا نقاش سياسي و لا خناقة من غير لازمة و تقلب بنكد بقية اليوم…. فعلا مكالمة التليفون مع حد من أصحابك اللطاف أثبتت أنها أكثر فاعلية أنها تخرجك من مود النكد.
- غيري هدومك و حطي ميكب كدة و ممكن برفيوم – طبعا جوه بيتك – و البسي حاجة مختلفة عن البيجاما!…ممكن فستان حلو مثلا بقالك كتير – أو من ساعة ما خلفتي غالبا – ملبستيهوش…
- ممكن تنزلي مع حد من أصحابك تشتري حاجات محتاجاها – أو مش محتاجاها قوي يعني! – و يا سلام لو صاحبتك الي هتسوق و توصلك يا سلااااااااااااااااااااااام….
- اعملي عمل خير طلعي أي صدقة حتي لو بسيطة أو سعدي حد محتاج مساعدة من أصحابك مثلا.
- اتكلمي مع تيتة أو جدو أو أي حد كسر ال60 في العيلة بجد بيبقوا ناس دماغها عالية و رايقين و عندهم قصص – غالبا سمعيتها 60 مرة قبل كدة – بس و الله بتخالي الواحد يفك…
- أولا و أخير كتري من ذكر الله في حياتك و الصلاة علي النبي صلي الله عليه و سلم و الدعاء في كل صلاة زي ما النبي (ص) علمنا : اللَّهُمَّ إِنِّي أَعُوذُ بِكَ مِنْ الْهَمِّ وَالْحَزَنِ، وَأَعُوذُ بِكَ مِنْ الْعَجْزِ وَالْكَسَلِ، وَأَعُوذُ بِكَ مِنْ الْجُبْنِ وَالْبُخْلِ، وَأَعُوذُ بِكَ مِنْ غَلَبَةِ الدَّيْنِ، وَقَهْرِ الرِّجَالِ (رواه أبو داوود).
سارة طاهر
رئيس تحرير مج لاتيه
مواضيع أخري اخترناها لك :
9 أشياء تحتاجين لاضافتها لحياتك
حتي لا تكوني بطة.. أفكار لتنمية ذاتك و استغلال وقتك
اللَّهُمَّ إِنِّي أَعُوذُ بِكَ مِنْ الْهَمِّ وَالْحَزَنِ،
وَأَعُوذُ بِكَ مِنْ الْعَجْزِ وَالْكَسَلِ،
وَأَعُوذُ بِكَ مِنْ الْجُبْنِ وَالْبُخْلِ،
وَأَعُوذُ بِكَ مِنْ غَلَبَةِ الدَّيْنِ،
وَقَهْرِ الرِّجَالِ (
جزاكى الله خيرا على هذه المعلومات .انا فعلا كنت محتاجه هذه الكلمات
يارب نرزق راحة البال
جميل جدا
ما شاء الله