.
طبعا الدنيا حوالينا بقيت صعبة و ظروف البلد سواء اقتصاديا أو اجتماعيا بتزيد صعوبة كل يوم بس مش عاوزين الوحش يناسينا الحلو و لو بصينا حوالينا كدة لسه في حاجات حلوة في مصر….
- في مقولة بتقول: القُرآن نزل في الحجاز، و كتب في الشام وقُرئ في مِصْرَ بمعني انه القرآن نزل في بلاد الحجاز و أحسن مكان تجيب منه مصاحف هو بلاد الشام في أحسن مكان صنع فيه المصاحف و وقُرئ في مِصْرَ أن مصر فيها أفضل قراء القرآن في العالم اتقانا في الأداء… لسه في خير فيكي يا مصر!
- الصحاب! علي فكرة مفيش زي صحابك المصريين و متحاولش تقنع نفسك مهم روحت و جيت الصحبة و الصحاب في مصر حاجة تانية حقيقي…أصل بالمنطق كدة حتي هتلاقي الغتاته دي كلها فين تاني؟؟؟ حتي بصي لنفسك في المراية
- بصوا بقي مفيش زي أكل مصر و الي عايش برة يقولوكوا! مفيش زي الStreet food و الحلويات الشرقية المصرية و الكشري و الطعمية و لو روحتي أي حتة تانية هتحسي انك بتاكلي أكل العيانيين مفيهوش التاتش المصري الأصيل!
- التريقة و الهزار… مفيش شعب بيضحك الضحك بتاعنا في الحلوة و المرة و تحت أي ظرف بجد!
- السهر… أهي دي من مميزات مصر… كله فاتح 24 ساعة مطاعم, كافيهات, كافة شئ و في ديليفري كمان (يعني فاتح و عليه بوسة!).
- الفتي و الفهلوة أيوه بجد مش هتلاقي ناس ممكن تتكلم معاكي في أي حاجة سواء بيفهم فيها أو لا الا في مصر! انجوي
- الجدعنة هتقولولي كان زمان…الحقيقة لا مش زمان و لا حاجة بس عشان الدنيا بقيت قرية صغيرة نتيجة الانترنت و وسائل التواصل الاجتماعي بقينا بنعرف كل حاجة و للأسف الاعلام مش بيهتم غير انه ينقل الوحش عشان هو ده الي بيخاليه يبيع جرايد أكتر و يحقق نسبة مشاهدات أعلي و هكذا خلونا نتخيل اننا عايشين في غابة..حتي لو الوحش كتير… لسه الكويس و الناس الطيبة و الجدعة أكتر!
مع تنمياتنا لكم باقامة سعيدة !
فريق عمل مج لاتيه
[اقرئي أيضا: حكاية وجوه مصرية]
photo credit: bigphoto
اترك تعليقاً
يجب أنت تكون مسجل الدخول لتضيف تعليقاً.