أوّلًا (وقبل أي حاجة): ماتتجوّزيش غير حد تكوني بتحبّيه بمُميّزاتُه وعُيوبُه، وماتكونيش مخطّطة إنِّك هاتغيّريه بعد الجواز، لإنُّه مش هايتغيّر.
ثانيًا: ماتجيش على نفسك زيادة عن اللزوم.. كتير من البنات في أوّل الجواز بيبذلوا أقصى طاقة مُمكِنة لإرضاء أزواجهم، ويعيشوا في دور (الزوجة المثاليّة) وده غلط جدًّا من وجهة نظري، لإنه أوّلًا؛ إنتي بتتوقّعي رَد فِعل وتقدير كبير جدًّا مُقابل إللي بتقدّميه، وطبعًا ده مابيحصلش، وبالتالي بيجيلك إحباط، ويصبح الاستمرار في تقديم التنازُلات أمر ثقيل، ومُتعِب. ثانيًا؛ الزوج بياخُد على كده، ولمّا تيجي تقلّلي إلى المستوى الطبيعى، هاتبقي مقصّرة!
ثالثًا: جو المرح والهزار.. خَلّي دايمًا جو بيتك مَرِح، وخَلّي دايمًا عندِك أمل.. (تفاءلوا بالخير تجدوه).
رابعًا: الثقة العمياء.. وبلاش حركات المباحث حتى لو إنتي شايفة إن زوجك مش أهل للثقة دي، برضُه ثِقي فيه، لإن الشّكْ مالوش أي لازمة.. إزّاي؟ أوّلًا؛ لو شَكِّك مش في مَحَلُّه هايتخنِق، وهاتخلّيه يضطرّ يكذب عليكي لتفادي أي إثارة لهذا الوهم، ولمّا يزهق هايبتدي يفكّر في الموضوع بجد، وساعتها هايبقى شَكِّك في مَحَلُّه.. برافو!
أَمّا بقى لو شَكِّك من الأوِّل فعلًا في مَحَلُّه، هتحرقي دَمِّك، وتسرّعي لكشف الحقيقة إللي هاتزعّلِك. في حين إنِّك لو مافتّشتيش وراه، وسِبتي الأمور عادية، هايحصل حاجة من الاتنين: يا يرجع عن إللي بيعملُه من نفسُه -وده يبقى خير وبَرَكة-، يا يستمر للدرجة إللي تخلّي ربّنا يفضحُه من غير ما تبذلي أي مجهود.. وساعتها بقى معرفش.. شوفي إنتي بقى.
خامسًا: الاهتمام بالتفاصيل.. الحُب الحقيقي يكمُن في التفاصيل. هو ده إللي بيميِّز الحبيب أو الزوج عن أي شخص آخر.. لمّا كُل واحد يهتم بالتفاصيل الصُغيّرة إللي بتفرق مع التاني.
اترك تعليقاً
يجب أنت تكون مسجل الدخول لتضيف تعليقاً.