هو ليه كل الناس عمّالة تكتب نصايح للستات، ومحسّسينّا إننا سبب المشاكل، مع إننا نسائم تمشي على الأرض. دا إحنا أسهل من السهولة، وأبسط من البساطة.. هو فيه زيّنا!
فأنا قرّرت بقى أدخل عِشّ الدبابير، وأنصح الأزواج، فإليكم أيُّها الأزواج عِدّة نصائح، لو التزمتم بها، فهنيئًا لكم، وستنعمون بحياة سعيدة هادئة، بدون أي مشاكل أو منغّصات.
استعنّا على الشقا بالله..
- هل هنبقى بنتقِّل عليكم، لو طلبنا إنكم تقلعوا فردتين الشراب في حِتّة واحدة؟! طبعًا إحنا مش معترضين إنكم ترموها على الأرض خالص، ولا نجرؤ نطلب إنكم تحطّوها في سَبَت الغسيل إطلاقًا، بس كل حلمنا إن الفردتين يكونوا مع بعض بس.
- ياريت متخبّوش منّنا المناديل المُستعمَلة بين شِلَتْ الكنبة، بهدلتوا الآنترييه.
ممكن تحطّوها جنبكُم على الترابيزة، ولو مفيش ترابيزة، حُطّوها على الكنبة، مش لازم عملية دفن المناديل دي! مع إن على بُعد ٣ خطوات، فيه سَلّة زبالة – ودي مش ديكور على فكرة – فيه ناس بتستخدمها عادي، ومش بيحصلُّهم حاجة، وعايشين. :)))) - هل فيه مشكلة ما أو عُقدة نفسية، عملت حائل منيع في إنكم تغطّوا المعجون تاني، بعدما تستخدموه؟ ( سؤال وجودي ). إحنا مقدّرين جدًّا وقتكم، وإنكم مش فاضيين للتفاهات دي، بس العملية الشاقة دي، مش بتاخُد أكتر من جزء من الثانية. وسؤال وجودي آخر: “هل مش بتستغربوا، لمّا كل مرّة تيجوا تستخدموا المعجون، بتلاقوه متغطّي؟”، هل ده مش بيفرض تساؤلات منطقية عندكم لأسباب حدوث هذه الواقعة ؟!”.
- كل محاولاتكم لرمي الحاجة في سَلّة الزبالة عن طريق لعبة كرة السلة، فشلت فشل ذريع على فكرة، فميش أي داعي للإصرار على المحاولة، سيبوا الحاجة جنب المناديل.
- على فكرة، العيال إللي بتجري وتلعب معانا في الشقة، دول ولادنا إحنا الاتنين! أنا عارفة إنكم اتفاجئتُم!، بس هي دايمًا كده، الحقيقة موجعة، فمش هيحصل حاجة لو اتعاملتُم معاهم.. حاولوا، مش هتخسروا حاجة.
- مش أقل من رُبع أو تِلْت أيام الشهر بتاكلوا أكل بايت، فبلاش نغمة “أنا ماباكُلش أكل بايت” دي؛ علشان بتاكلوه، وبتاكلوه كتير كمان، وإنتم مش عارفين الفرق بين الأكل البايت والطازة أساسًا.. هع هع هع (ضحكة شريرة).
- ليه لمّا بتاخدوا هدوم من الدولاب، وتكون متعلّقة على الشمّاعة، بترموا الشمّاعة في الدولاب؟ ليه.. هاه.. ليه؟!، ليه بتعملوا كده؟!
- هو طلب صعب أنا عارفة، بس أنا طمعانة في كرم أخلاقكم.. مش لازم تجيبوا أسفل الهدوم أعلاها وأعلاها أسفلها، وإنتوا بتجيبوها من الدولاب. إنتوا متعرفوش الهدوم المتطبّقة دي، مرّت بكذا مرحلة، علشان توصل لمرحلة الرقود بسلام في الدولاب! الرحمة حلوة.
- دا غير الأنوار إللي بتتولّع ومابتطّفيش، والأبواب إللي بتتفتح ومابتتقفلش، والهدوم المرميّة في كل حِتّة، دا غير دايرة الكركبة إللي لازم تكون محاوطاكُم في أي مكان، والحَمّام إللي غرقان مَايّة على طول بسبب وبدون سبب، والدولاب إللي دائمًا وأبدًا مفتوح هو والأدراج. كل دي حاجات، عَجَز الإنسان عن فهم كيفية وأسباب حدوثها!
- (العربيّة)، بس كده، إنتوا عارفين إللي فيها. :))))
- فيه لُغْز بقى حَيّر كل الزوجات بدون استثناء، هو أول ما بتبتدوا تتكلّموا في التليفون مع صحابكُم، مع أول كلمة وهي “آلو”، إيه إللي بيحصل، ويسبّب هذه الكمية من الضحك الصاخب المستمر على مدار المكالمة، وضحك يسمّع الجيران!! إحنا لُذاذ على فكرة جدًّا، فبلاش تعملوا كده، وتحسّسونا إنكم قاعدين معانا متنكّدين، والفرج جالكُم في المكالمة.
- نيجي بقى للاختراع إللي بيُسمَّى بـ“الجزّامة”، دا اختراع باين كده من اسمه، إنه مكان بيتشال فيه الجِزَم يا جماعة، مش بنجيبه وبندفع فيه آد كده، علشان نتمنظر بيه على فكرة، بس مش هتقِّل عليكم، حُطّوا الجِزَم جنب الجزّامة، مش لازم جوّاها. أنا عارفة، ضهركُم مش حمل إنكم توطّوا وتشيلوا الجِزَم، أُمّال إنتوا اتجوّزتونا ليه؟ :))))
- وليه كل ما تيجوا تشربوا، بتطلّعوا إزازة المايّة من التلّاجة، ومش بتدخّلوها تاني، ولمّا تعطشوا تاني، تروحوا تطلّعوا واحدة تانية؟!، والغريب بتحطّوها جنب أُختها برّه التلّاجة! طبعًا أنا مقدّرة جدًّا إنكم جيتُم على نفسكم، وقُمتوا بنفسكم من على الموبايل أو من قُدّام التليفزيون، علشان تشربوا، بس اعذورنا، هنقعُد في وقت فراغنا نِلِمّ الشوربات، ولّا نِلِمّ أزايز المايّة؟!
- طلب أخير.. ممكن تحطّوا المعلقة إللي قلّبتوا بيها الشاي في الحوض، مش على الرُخامة.
مي محي الدين
مواضيع مميزة
حتي يحبك زوجك ابتعدي عن هذه الصفات!
5 أكاذيب تقوليها لنفسك كل يوم!
يا معندكيش طموح يا معندكيش قلب… لابد أن تكوني أحدي الاثنين!
الصورة: bigstock
