عارفين فترة إعدادي دي إللي كُنّا بدأنا فيها نحِسّ بنفسنا شويّتين تلاتة، ومش عاجبنا العَجَب؟ فاكرين العِنْد، والتَمَرُّد على أي حاجة وكُل حاجة بيقولوها لنا الأُمّ والأب؟ الفترة إللي الأهل فيها “بيتخَضّوا” لمّا يلاقوا ولادهم فجأة بقوا طولهم، وصوتهم بدأ يعلى، وتبدأ المعركة.. الأهل شايفين عيالهم بيخرجوا عن طوعهم، و بيحاولوا يعدلوهم.. ليل نهار شَدّ وجَذْب، واعمل وماتعملش..
الفترة دي بتعَدّي، وإحنا بنكبر، نهدا، ونعقل، ونفهم إن كل طَلَعان العين، والفَرْهَدة إللي كانوا فيها دي كانت لمصلحتنا، وإن أهلنا هم أكتر ناس بيحبّونا، وخايفين علينا. ولمّا نقعد بقى مع نفسنا شويّة كده في ساعة صَفا، والنت فاصل، ومش لاقيين حاجة نعملها.. بنكتشف إن كان عندهم حق إننا مانصاحِبش فُلان، ونبطَّل نشرب نِسكافيه وكابوتشينو باليل، وماناكُلْش برّة كتير..
بس برضُه بيفضل رواسب تمرُّد، وتلاقيك بتقول لنفسك: “لا بس أنا غير أُمّي وأبويا.. أنا مُختلفة عنهم في كل حاجة”.. وتبدأ مشاعر “لن أعيش في جلباب أبي” تِرِنّ في ودانك.. أنا ماكنش عاجبني أسلوبهم، ومش هعمل زيُّهم في كذا وكذا وكذا.. الكهربا هتقطع، والنت هيفصل تاني، وتقومي تعملي لنفسك حاجة سُخْنة.. هتلاقيكي بتعمليها بالظّبط زي ما مامتك بتحبّها! تيجي تقعدي في الأنتريه تلاقي كرسي السُفْرة مَعْووج.. تروحي تعدليه بسرعة عشان إنتي زي أبوكي.. مابتحِبّيش حاجه مش في مكانها!
طيّب دي جينات.. عادي يعني.. الغريب بقى إنك هَتتحَطّي في مواقف، وتقفشي نفسك وإنتي بتتصَرّفي زيُّهم.. التصرُّف إللي كان بيعجبك ساعات وساعات ماكنش (من وجهة نظرك) أحسن حاجة، وبتقولي في بالك: “أنا غيرهم”!! لمّا تخلّفي، هيصيبك الذهول للحظات لمّا تلاقي نفسك بتقولي لابنك جُمْلة أُمِّك المشهورة: “قوم من قُدّام الزّفت ده إللي هيضيّع نظرك”، وهتلاقيكي بتمشي وراهم بطَبَق السَلَطة عشان ياكلوه برضه! ردودك فيها من كلامهم إللي كانوا دايمًا بيقولوه قُدّامك.. سواء كان كويّس أو لأ، عارفة بمزاجك أو غصب عنِّك.. إنتي شَبَهُّهم وأخدتي من طباعهم وأسلوبهم..
الخُلاصة.. ولادكم هيطلعوا شبهكم، بمزاجكم أو غصبٍ عنكم وعنهم.. عايزين ولادكم هاديين ومُسالمين إزّاي وإنتم عصبيّين؟! يطلعوا عارفين قيمة الفلوس إزّاي وإنتم بتصرفوا يمين وشمال ع الفاضي و والمليان؟! هيعاملوا الناس كويّس ليه وأهلهم بيعاملوا الناس بتَكَبُّر وعنجهيّة؟! عايزنهم يطلعوا أحسن ناس إزّاي وإحنا فينا العِبَر؟!.. من الآخر.. إللي مش عاجبك في نفسك، غيّرُه قبل ولادك ما ياخدوه منك!!
مروة محمد
يمكنك أيضا قراءة
