كُلّنا بنُقَف أمام قصص النجاح بإعجاب شديد، وأكيد كُنّا بنتمنّى نشوف نفسنا ناجحين ومحَقَّقين أهدافنا في الحياة. كُل واحد فينا عندُه مقوّمات للنجاح في مجال مُعيَّن. المحظوظين هُمّا إللي بيقدروا يعرفوا مقوّماتهم، وينمّوها يوم بعد يوم لحد ما يوصلوا للهدف. فيه حاجات عامة لو اتعملت بشكل يومي، وبقت عادات عندنا حتساعدنا على الوصول لمقوّماتنا وتنميتها، وبالتالي حنوصل للنجاح والسعادة، ونعمل بإيدينا قصص نجاحنا..
1- نصحى بدري..
مش كُلّنا بنحب الصَحَيان بدري للأسف.. بس لازم. الصُبح بدري وقت مِلْك لك فقط.غالبًا مابيكونش فيه مصادر إزعاج خارجيّة سواء تليفونات أو طَلَبات من الآخرين. أكثر الأوقات الذِهْن بيكون صافي وحاضِر. نسبة إنجاز أكتر قَدْر من الأعمال في أقل وقت ممكن بتكون عالية. ربّنا قال عليه في القرآن: “معاشًا”، فإللي مش بيصحى بدري مش محَقَّق المعاش الكامل، بالتعوُّد والتدريج حيبقى مش صعب.
2- قَضّي وقت مع من تحب..
يعني إيه؟! مش حشتغل 20 ساعة؟ الإجابه لأ. كُل لَمّا الإنسان عَمَل توازُن ما بين ساعات العمل والساعات إللي بيقضّيها مع أُسْرتُه، أو مع من يحب.. زادت كفاءتُه وقُدرتُه على الإبداع والنجاح. وكُل ما أهلَك آدميتُه في “الشغل” كُل ما استنفذ من قدرته البشريّة على العطاء الحقيقي. البشر مش مَكَنْ ، الإنسان كائن اجتماعي وسيظلّ كذلك، ونجاحه وسعادته مُرتَبطين بتواصلُه مع الآخرين.
3- الصلاة..
ودي إيه علاقتها بالنجاح؟ الصلاة بمفهومها العام تشمل وقْفَة مع النفس، وانفصال تام من دوّامة اليوم. زي ما في خلال اليوم المِعْدَة بتجوع، وبتاخد وقت في الأكل، والعقل والجسد بيتعبوا، وبيحتاجوا يفْصِلوا.. الصلاة بتساعد على الهدوء، والتواصُل مع النفس، ورؤية أشْمَل للأمور من الخارج، وبالتالي الرجوع لمزاولة الأعمال بنشاط وهِمّة أعلى.
4- وزَّع الأعمال الصغيرة..
كُلّنا ساعات بنحب نعمل كُل حاجة بأيادينا متَصوّرين إن ده الحَلّ الأمثل لإنجاز الأعمال على أكْمَل وجه. الحقيقة إنُّه العكس.. طاقة البشر مهما كِبْرِت فهي محدودة، فمن مُمَيّزات الناس الناجحين إنُّهم بيعرفوا يوزّعوا بعض المهام الصغيرة لغيرهم، وماتكونش محتاجهم شخصيًّا. بالطريقة دي هُمّا بيقدروا يفرغوا عقولهم، ويوفَّروا جُهْدُهم لشىء ماحَدِّش غيرهم يقدر يقوم به.
5- خَطَّط ودَوِّن كل شىء..
فيه وزارة بحالها اسمها “التخطيط”.. ماتستهْونش بيها هي بس بعافية شويّة عندنا. لازم يكون عندنا خطط سنويّة، وشهريّة، وأسبوعيّة، ويوميّة. التحرُّك على أساس خطة موضوعة وواقعيّة طبعًا بيضاعف فُرَصْ النجاح عشر مَرّات، والتدوين لِما تَمّ فعله وإنجازه فى هذه الخطط، يُعتَبَر مرجِع أساسي للتقييم وللمساعدة في التخطيط للمستقبل مَرّة أخرى.
6- ثِقّ في قدراتك..
إنت مُختلِف.. لَمْ ولَنْ يولَد نُسخة منك! هذا كافي ليرفع معنويّاتك في السماء، لكن قد ينسى بعضنا هذه الحقيقة.. لذلك يجب أن تذكِّر نفسك يوميًّا بأهميَّتك، وقدرتك على الإنجاز. اكتب على الأقل فِعْل واحد جيّد تفعله يوميًّا. ستبني بذلك ثقتك بنفسك، وإحساسك بالتفوّق.
7- اقرأ..
اقرأ أي حاجة في أي مكان في أي وقت! من غير شَكْ القراية بتغيَّر دايمًا الأفكار، وبتوسَّع القُدرة على الاستيعاب، والتفاعُل مع العالم الخارجي. خَلّي دايمًا معاك في الشنطة كتاب بتقراه. استثمر دقايق الانتظار في أي مكان، قبل النوم، في المواصلات.. كُل سَطْر بتقراه في أي مجال بيضيف لك حاجة جديدة.. بعد فترة قصيرة ستلاحظ التغيُّر الشامل.
8- اخطأ..
ماحَدِّش مابيغْلَطش.. الناجحين فقط هُمّا إللي بيتبسطوا لَمّا يغلطوا.. ليه؟ لإنهم أوّلًا، بيعرفوا إنهم مُتَحَرّكين مش ثابتين. ثانيًا، لإن الخطأ في حد ذاته يحمل إشارة للإصلاح.. يعنى كُل خطأ بييجي معاه فرصة للتعلُّم، والتقدُّم، وزيادة الخبرات.
9- اشعُر بالامتنان..
الامتنان معناها معرفة ما لديك من نِعَمْ، أو مزايا، أو أشياء عندك ومش عند غيرك، أو شعور بقيمة ما تملك. ينطبق الكلام ده على كُل شىء في الحياة سواء كان مادي أو معنوي. اشعُر بالامتنان إنك بتتنفِّس.. بتفكَّر.. بتتحرَّك.. بتغلَط.. بتحلَم. الشعور بالامتنان بيفتح أبواب الطاقة الإيجابيّة عندنا، وبيساعدنا أكتر على تقدير كُل ما لدينا، والاستمتاع به.
10- خَلّي عندك أمل..
كُل حاجه حوالينا بتقولّنا إن الأمل موجود. الشمس بتطلع كُل يوم.. دُوَل كانت عايشة في الظلام والجهل النهاردة أكثرنا تقدُّمًا وازدهارًا. الكون كُلُّه مُتَحَرِّك. رغبتك في التغيير والنجاح لوحدها أمل. احلم ..ده أوِّل خطوة للصعود، وامشي وراء حلمك. اتعب.. استمتع.. فكَّر.. نفِّذ.. وخَلّي عندك أمل.
مي الحُسيني
مواضيع ستعجبك
