ممارسة الرياضة شئ مهم جدًّا ولازم يبقى جُزْء من حياتنا، لكن بعض الناس عندها عادات ومفاهيم خاطئة حول ممارسة الرياضة.. وإللي من أكبرها إن الناس مُتَخَيّلة إن ممارسة الرياضة للتخسيس وبس!
طب هو مش ممكن ألعب رياضة عشان صِحّتي، والمحافظة على شَكْلي، وتقوية عضلاتي وأوِّلهم عَضَلَة القلب (أكتر عَضَلَة بتشتغل ومابترتَحْش) وزيّها زي أي عَضَلَة محتاجة تقوية. وبالتالي ضَخّ الدم في الجسم هيكون أقوى، وده هَيخَلّيك تشعر بتَحَسُّن في صِحِّتك ونشاطك اليومي، وده بنعملُه في كلاس الكارديو (Cardio).
على فكرة.. فيه ناس جِسْمُهُم كويّس جدًّا، لكن صِحِّتهم ضعيفة وبتتعَبْ من أقل مجهود زي طلوع السِلِّم دورين مثلًا! فالمفهوم إللي لازم نغَيَّرُه إن الرياضة أكبر بكتير من فكرة التخسيس، ولو شُفْت مثلًا أي كلاس آيروبكس في الدول الغربية هتلاقوا أغلب الحاضرين أجسامهم كويّسة جدًّا! للأسف الثقافة دي مش عندنا، وهي ممارسة الرياضة للمحافظة على اللياقة والصِحَّة الجيّدة. أنا بَشَجَّع كل واحد وواحدة إنهم لازم يكون ليهم نظام رياضي ثابت ومُسْتَمِر للمحافظة على نشاط الجِسْم، وبعد الانتظام هتلاقي نفسك قادر تِدّي في يومك مجهود أكتر بكتير من المجهود المبذول إللي كنت بتعملُه قبل ممارسة الرياضة .
هَنيجي لِلّي عايز يخِسّ.. الوزن الزائد محتاج منك قرار أوَّلًا، وبعدُه شويّة مجهود للتَخَلُّص منه. لازم تكون مُدْرِك ده كويّس عشان تقدر تواصِلْ لفترة طويلة، بمعنى إن مش بس الرياضة ساعتين في الإسبوع بس هي إللي هَتْخَسِّسَك في شهر! ليه الناس بتكون سايبة جِسْمها ومُهْمِلة فيه سنين، ولمّا تيجي تخِسّ تبقى عايزة نتيجة في شهر أو شهرين؟ !ده غير إن النظام الغذائي بيكون آخِر لخبطة, وده طبعًا ليه مُتَخَصِّصين لازم الاستعانة بيهم.
تعرف إن مواظبتك على ممارسة الرياضة هيعَلّي مُعَدَّل الحَرْق عندك بشكل كبير؟
يعني مثلًا, متوَسِّط مُعَدَّل حَرْق المرأة من 1400 لـ 1800 كالوري في اليوم، أمّا المرأة إللي بتمارس رياضة فتقدر تِحْرَق لـ 2400 كالوري في اليوم. ممارسة الرياضة 3 مَرّات في الإسبوع فأكتر تزيد من مُعَدَّل الحَرْق إلى 130 كالوري في اليوم الواحد.
واحدة واحدة على نفسك.. بلاقي ناس نِفْسها تخِسّ جدًّا، ومُتَحَمٍّسة جدًّا في الأوِّل، وعندها استعداد تتمَرَّن طول الإسبوع.. تفضل كده بالكتير أوي لمُدِّة شهرين، وبعدين ترجع تقعُد في البيت تاني! الرياضة مش قَفْش يا جماعة J.. واحدة واحدة على جِسْمَك, إنت سايب الرياضة من سنين، يعني عَضَلاتك ضعيفة جدًّا، فَماينفعش فجأة تِدّي العَضَلة حِمْل عالي بالشكل ده! التَدَرُّج هو الصح. ابدأ برياضة مَرّتين في الإسبوع لحَد ما جِسْمَك يتعَوِّد، وبعد فترة تقدر تزوِّد لـ ٣ مَرّات ثُمَّ لـ ٤ مَرّات.
إللي بيروح الچيم عشان يخِسّ، أو يشِدّ جِسْمُه، أو يزَوِّد اللياقة (Fitness).. أرجوك رَكِّز على هدفك، بمعنى إن البرنامج الرياضي لِلّي عايز يخِسّ غير لِلّي عايز يشِدّ غير لِلّي بيزَوِّد اللياقة ((Fitness. والمشكلة الكبيرة إن كتير من المُدَرِّبين في الچيم بيعملوا برنامج واحد للكُلْ ؛٣٠ دقيقة مَشّاية على ٣٠ دقيقة عَجَلة وياخدك يلَفِّفَك على كل الأجهزة.. وكده إنت اتمَرَّنْت! التمرين مش بكُتْرُه أو بزيادة مُدِّتُه. أنصحك باختيار الچيم إللي عنده مُدَرِّبين مُتَخَصِّصين (Certified Personal Trainer) عشان نَتَفادى المشكلة دي، ونفس الكلام في الآيروبكس.. لازم تكون مُدَرِّبة الآيروبكس مُعْتَمَدة (Certified Aerobics Trainer) عشان تستفيد استفادة قُصْوى من التمرين، وبدون احتمال التَعَرُّض لأي إصابة.
أخيرًا.. أحب أقولَّك: حِبْ نفسك واهتم بيها، العب رياضة عشان إنت أوَّلًا تكون راضي عن نفسك، وحابِب شَكْلَك، وتقدر تِطَلَّع طاقتك في المكان الصحيح، والساعة إللي هَتمارِس فيها الرياضة دي هَتكون بتاعتك لوحدك بعيدًا عن ضغط البيت والأولاد والشغل والحياة العامة.. وده هَيفرِق جدًّا في حالتك النفسيّة للأحسن طبعًا، وقُدْرة تَحَمُّلَك لمهامك باقي اليوم إن شاء الله.
دينا الهضيبي
Safe Certified Aerobics and Fitness Education Instructor.
مواضيع أخري اخترناها لك:
7 أشياء ستغيرها ممارسة الرياضة في حياتك!
الصورة: Bigstock
