لسه عارفة إنك حامل؟.. ألف ألف مبروك. طبعًا هتجري على جوزك تقوليله، وبعدين صاروخ على التليفون، وتقولي لمامتك ومامتُه والعيلة والأهل والصحاب.. استنّي استنّي..
اهدي كده، وبِرّاحة وخُدي مِنّي.. ليه ماتخَلّيش اللحظة دي لحظة ماتتنسيش؟ ليه تحرقي مفاجأة زي دي على التليفون، أو في رسالة على واتس آب؟
أحكيلِك يا سِتّي.. في يوم كنت بَتْفَرَّج في YouTube على ڤيديو، وطِلِعْلي في الـ suggestions (أو الاقتراحات) إللي على جنب، ڤيديو اسمه pregnancy announcement.. يعني “إعلان الحَمْل”! بصراحة مافهِمْتِش عايز إيه يعني؟! لقيته عبارة عن بَنّوتة اكتشفت إنها حامِل، وعايزة تقول لجوزها وأهلها وأهل جوزها، بس بطريقة مُبْتَكَرة يبقى فيها فكرة تخَلّي اليوم ده مايتنِسيش. طبعًا الڤيديو ده جاب تحتُه ٣٠ واحد عن نفس الموضوع. إيه ده؟! دي حاجة مشهورة بقى! اكتشفت إن الخواجات بتوع بَرّه فعلًا بيخَلّوا للموضوع ده طعم تاني خالص غيرنا، وبيبتِكْروا أساليب وطُرُقْ يبَلَّغوا بيها بعض بالخبر الجميل ده.. وده طبعًا بالنسبالنا هنا حاجة غريبة!
هقولُّكُم على كام فكرة شوفتها.. إزّاي تفاجئي جوزِك وأهلِك إنك حامِل؟:
الزوج:
- جيبيلُه t-shirt مطبوع عليه best daddy to be أو أي جملة توحي إنه هيبقي أب، وإدّيهوله، وشوفي رَدّ فعله لمّا يجمَّع إنتي عايزة تقوليلُه إيه؟
- ممكن تشتري لِبْس بيبي (شراب – طاقيّة) أي حاجة من الحاجات المِنَمْنِمة إللي بنبقى هنموت نشتريها دي لمّا بنشوفها. حُطّيها في شنطة هدايا، وإدّيهاله في الوقت المناسب.
(photo credit: bigstock) - بوكيه ورد، وفيه كارت مكتوب عليه: “مبروك.. هتبقى أب” مثلًا.. يرجع من الشغل يلاقيه على السُفْرة.
- تشتري البالون إللي على شكل بيبي ده، وتحُطّيها في الصالة، وأوِّل لمّا ييجي من بَرّه يشوفها.
(photo credit: flickr/Lincoln Braun) - ممكن تفاجئيه على الفطار الصُبْح يوم الأجازة وهو بيشرب الشاي في “المَجّ السحري” إللي إنتي اشتريتيهولُه. ده بقى لمّا بيتمِلي حاجة سُخْنة، الصورة إللي عليه بتْبان.. وإنتي وذوقِك.. حُطّي صورة أو كلام يوصَّلوا الرسالة.
- لو ماعندكيش وقت تعملي أي حاجة من دول ممكن تفَرَّجيه على اختبار الحَمْل، وتسيبيه يستَنْتِج لوحده، وتسأليه هو شايف إيه؟ وبعدين تقوليلُه إنك حامِل.
طيّب الأهل؟ :
كل إللي فات ده ممكن ينفع لو عايزة تفاجئي حد من أهلِك أو أهلُه.. رقم ٢ جميلة قوي بالذّات لو مِجَمَّعة العيلة، وبتِدّيهُم كُلُّهًم هدايا، وتطلبي منهم يفتحوها مع بعض، وتشوفي مين هيجَمَّع الأوَّل؟ وطبعًا استَعِدّي للأحضان الكتير :).. ومش عيب إنك تقوليلهم يبقوا يردّوا الهدايا إللي خَدوها دي بعد 9 شهور :)..
وربِّنا يفَرَّح كل الناس :)..
مروة محمد
مواضيع أخري اخترناها لك:
9 أشياء تحتاجين لاضافتها لحياتك
الصورة الرئيسية: Bigstock
اترك تعليقاً
يجب أنت تكون مسجل الدخول لتضيف تعليقاً.