_يا دكتور الحقني.. أنا مابقتش أخس خالص! ده أنا يمكن وزني بيزيد من ساعة ما جيتلك!
_إزاي بس يا مدام؟! طيب حضرتك جبتي الأكل الدايت إللي طلبته منك؟
_آه والله يا دكتور.. جبت كل الأكل إللي حضرتك طلبته، ومفيش حاجة بتحوَّق فيّا.. ده أنا تخنت عليه كمان!
_طيب التزمتي بالأكل ده، ولّا شوية بتاكلي منه وشوية تانية بتاكلي الأكل إللي بيتخَّن؟
_خالص يا دكتور.. ملتزمة بالأكل الصحي، ومابقتش أدخَّل الأكل إللي بيتخذَن بيتي إلّا الحاجات إللي الولاد بيحبوها.
_يعني مفيش عيش فينو، ولا توست أبيض، ولا مخبوزات، ولا جاتوهات، ولا شيكولاتات؟
_إطلاقًا حضرتك.. مفيش الكلام ده خالص.
_طيب بتاكلي توست بني، ورز بسمتي، وبتشربي لبن رايب، وزبادي خالي الدسم؟
_طبعًا يا دكتور.. ده أنا حتى اسمرّيت من كتر الحاجات البني إللي باكلها! توست بني، ورز بني، ومكرونة بني، وكمان سكر بني.
_وبتفطري شوفان، وموسلي، وجرانولا، وبتحطي في أكلك بذور الكتان وحبوب الشيا؟
_كله كله يا دكتور.. كل الحاجات العجيبة الغريبة المريبة إللي طعمها زي المضاد الحيوي دي ماباكلش غيرها يا دكتور.
_حاجة غريبة أوي!!
_يا دكتور، أنا زهقت بجد.. مفيش حاجة نافعة، وعمّالة أتخن وأتضخَّم ومش لاقية حلول.. أعمل إيه؟! ساعدني أرجوك.
_كده يبقى فيه مشكلة تانية بتعاني منها. أصل الأكل إللي أنا كاتبهولك ده يخسِّس فيل، يبقى إزاي ماتخسّيش عليه؟!
_طيب إيه المشكلة بالظبط يا دكتور؟
_كده يا مدام يبقى فيه خلل في الهرمونات، وده سبب كبير إن وزنك بيزيد!
_أنا بقول كده برضه.. العيب مش في طريقة أكلي أكيد.. الحمد لله.
_دلوقتي هاكتبلك شوية أدوية تظبطلك الهرمونات، وتجيلي كمان أسبوع عشان نشوف الحل لحالتك الصعبة دي.
_ماشي يا دكتور.. كتَّر خيرك بجد.
وذهب الطبيب لكتابة بعض الأدوية لها، ثم استدرك نفسه قائلًا:
_لحظة واحدة..
_أيوة يا دكتور، خير؟
_إنتي بتعملي ساندوتشات إيه بالتوست البني؟
_إشمعنى السؤال ده يا دكتور؟
_مفيش عادي.. عايز أعرف.
_حضرتك أنا بعمل فيه سندوتشات نوتيلا.
_يا نهارك ملحوس!! نوتيلا وكمان ساندوتشات مش ساندوتش واحد !!!
_ما أنا ببقى جعانة حضرتك، وبعدين باحط عليه زبدة فول سوداني عشان

أتغدّى.
_تتغدّي! آه..
_وبعدين حضرتك باحط عليه …
_(مقاطعًا إياها) هو إنتي بتحطي لسه عليه حاجة سندوتش الديناميت ده؟!
_آه يا دكتور، عشان يبقى طعمه أحلى كمان بارُش عليه شوية مكسرات.
_بترشي عليه إيه؟!! ده أنا شكلي هارُش عليكي شوية بيرسول دلوقتي.
_ليه بس يا دكتور؟!
_دكتور مين بقى؟ ده أنا عايزك تنسي كلمة دكتور دي خالص.
_هدّي نفسك بس حضرتك.. هو إيه إللي حصل؟!
_إنتي بتسألي كمان!!! وأنا إللي مدوَّخ نفسي، وعمّال أضرب أخماس في أسداس عشان أعرف فين المشكلة وبتتخني إزاي؟ وكمان كنا ظالمين الهرمونات الغلبانة إللي ملهاش أي دخل في تُخنك!
_آه يا دكتور، مش حضرتك لسه قايلّي على موضوع الهرمونات المتلخبطة إللي بتزوِّد وزني!
_كمِّلي بس.. كمِّلي، عملتي إيه تاني؟
_خلاص حضرتك، كفاية عليك سندوتش النوتيلا.
_لأ إزاي.. لازم تقولي.. بتاكلي شوفان وموسلي؟
_آه يا دكتور وربنا..
_بلبن رايب زي ما قولتلك؟
_لأ..
_ولا زبادي خالي الدسم؟
_صراحة لأ برضه!
الدكتور صارخًا:
_أُمّال بإيه؟!
_لازم يعني ح..ض..ضررررتك؟
_آه .. لازم وضروري جدًّا.
_بقشطة بلدي ماما جايبهالي مخصوص.
_بقشطة يا ولية؟! قشطة!
_ولية إيه بس يا دكتور؟! مش كده خالص يعني!
_إنتي خليتي فيها دكتور! بقولك انسي الكلمة دي خالص أحسنلك.
_(بخوف) حاضر.. حاضر!
_قولتيلي بقى بتاكلي الحاجات دي بالقشطة؟
_آه يا دكتور، أصلي بارضَّع حضرتك ولازم الواد يتغذّي.
_كده مش بيتغذّى.. كده هتجيبيله تصلُّب في الشرايين.
_هما إللي قالولي عشان أغذّي الواد وينمو بسرعة حضرتك!
_ده أنا هاقتلك إنتي وهما.. قولي باقي الكوارث..
_مفيش حاجة خالص تاني!
_إزاي! والرز البسمتي أكيد بتبدعي فيه، قولي كده بتعمليه إزاي بالظبط؟
_عادي.. باحط 4 ملاعق سمنة بلدي، وشوية زبدة بلدي، وأسوّيه في شوربة

بط بلدي برضه، ولما يخلص بارُش عليه…
_خلااااااص عرفت.. بترُشي عليه زبيب بلدي، ومكسرات بلدي أكيد؟
_إيه ده.. غريبة؟! هههههه عرفت إزاي يا دكتور؟!
_بقولك متقوليش دكتووووور..
_واضح إن أعصاب حضرتك بايظة، أو فيه مشكلة في البيت وحضرتك متضايق أوي منها، فبقول أمشي دلوقتي، وآجي لحضرتك في وقت تاني..
_أنا فعلًا محتاج أروح لدكتور من إللي حصلّي النهاردة، أو هاغيَّر مهنتي حفاظًاعلى أعصابي إللي جالها شلل خماسي النهاردة، ونصيحة منّي.. أرجوكي ماتجيش هنا تاني، وماتروحيش لأي دكتور تغذية تاني عشان الناس دي غلابة وممكن يموتوا بسببك.
_ولو إني مش عارفة إيه المشكلة!! بس حاضر يا دكتور.. سلام!

 

دينا أمين

 

photo credit: bigstock

مواضيع أخري اخترناها لك:

لعله خير