ابنك أو بنتك بيحبوا يلبسوا نفس اللبس كل يوم؟

أطفال كتير بيحبوا يلبسوا نفس اللبس كل يوم و مش بيرضوا يغيروه و طبعا الأمهات ما بيعجبهمش … و تقول أحنا عندنا هدوم كتير لية دى؟ و بعدين الناس تقول ما عندكش لبس؟!

انتى عارفة أن أشهر الشخصيات الغنية و اللى أثرت فى العالم كانوا بيلبسوا نفس الألوان و نفس اللبس كل يوم!

زى مارك زوكربيرغ اللى عمل الفيس بوك بيلبس نفس التى شرت كل يوم…. لونها رمادى سادة و لما سألوه لية كدة … قال ده بيوفر طاقتى و مجهودى لإن قرار اختيار الملابس كل يوم مرهق و بياخد من تفكيرى و الأحسن أوفر المجهود و الوقت ده لقرارت مهمة!

و برضة ستيف جوبز مؤسس شركة ابل و من أشهر الشخصيات القيادية و الملهمة كان علي طول لابس قميص بسيط اسود و جينز و كوتشى مريح و كان بيفكر يخلى لكل موظفين أبل يونيفورم يروحوا بيه علشان يوفروا وقت و مجهود اختيار الملابس بس طبعا وجد رفض تام من الموظفين!

و غيرهم أمثلة كتير زى اينشتين دايما لابس نفس اللبس و عنده كذا واحدة من نفس البدلة و طبعا أطباء فى التحليل النفسى أكدوا أن معظم العباقرة عندهم روتين يومى بيوفر مجهودهم و وقتهم و يخليهم مركزين و مبدعين…

فلو ابنك بيلبس نفس اللبس أو عايز يعمل نفس الحاجة كل يوم … يمكن دى تكون جزء من عبقريته … اشترى له اتنين أو تلاتة من نفس اللبس الى بيحبه و خلية يلبسوا علي طول زى ما هو عايز و قولى للناس دة ابنى ما شاء الله زى مارك زوكربيرغ و اينشتين … يا رب يكون أحسن وأنجح… قولوا آمين…

 

د.هبة مهدى

www.ninjamamy.com

 

مواضيع أخري اخترناها لك:

ازاي أخلي ابني يسمع الكلام؟

أهمية قصص قبل النوم لأولادك

6 علامات علي أدمان أبنائك الآي باد والعلاج

 

photo credit: Bigstock