هى الستات أو تحديدا الزوجات عايزه إيه ؟
١- عايزه راجل ضهر ليها : يعنى واحد زى أبوها بيعشق كل تفاصيلها و يصلح كل غلطاتها بس بحب بينه و بينها يعاتبها و يبين لها غلطاتها لكن يتباهى بيها قدام العالم كله
٢- يكون صاحبها : أيوه صاحبها! أنجح زوج اللى يعرف يصاحب مراته… يعنى توصلها إنها لما تكون زعلانه منك و مش طايقاك إنها تخرج معاك على إنك صاحبها و تشتكليك منك ! تعرف تعمل كده ؟؟؟؟ رصيدك عندها يوصلها لده ؟؟؟ و لا لإنها عارفه إنك هتبرر كل غلطاتك و هتطلع ملاك؟؟… فبتسكت علشان الكلام مفيش منه فايدة ؟؟؟؟ على فكرة نهاية الكتمة اللى مراتك هتتكتمها وحشة و أنت أول واحد هتدفع تمنها!
٣- رومانسى : معلش دى بقي أصعب معادلة الرجالة يفهموها بس معلش التكرار يعلم الشطار. رومانسى : يعنى الكلمة الحلوة و النظرة الحلوة يعنى ما تنزلش من البيت إلا لما تسلم عليها و تبوسها ( طبعا أول جوازكوا هى اللى كانت بتجرى وراك علشان تتعود على كده بس للأسف مش هتفضل تجرى كتير وراك ).
رومانسى يعنى لما تصحيها للفجر طبطب عليها و بوسها لما ترجع من الشغل أول لما تدخل سلم عليها مش تسأل فين الأكل !!!!
رومانسى يعنى هاتلها ورد والله حلال مش حرام و هتفرح بيه أكتر من الجمبرى و الكباب …
رومانسى يعنى هاتلها الشكولاتة اللى بتحبها يعنى إبعتلها رسالها صغيرة قولها وحشتينى… عارفة إنك مضغوط طول اليوم علشان تعيشهم فى مستوى احسن و هى كمان مسحولة و طلعان عينها مع الملايكة اللى خلفتوهم.
رومانسى يعنى بوس ايدها لما تعملك أكلة حلوة… رومانسى يعنى لما تلاقى دولابك متروق و البيت بيبرق أنطق قول كلمة عدلة! رومانسى يعنى لما تغير لون شعرها و تعمل تسريحة و لبس جديد معلش تعالى على نفسك و خد بالك منها إعتبرها زى اللى بره اللى بتاخد بالك من كل حاجة فيهم.
و نرجع نقول الستات بتقرا قصص رومانسية و تتفرج على التركى ليه ؟؟؟؟ معلش مالقتش المصرى 🙂
من الأخر و بجد بقي عايز تتعلم الرمانسية روح إقرأ سيرة النبى و هتعرف أرقى حب و أجمل رومانسية.
٤- إعملها مفاجآت : مش لازم دايما علشان تتفسحوا أو تخرجوا مع بعض هى اللى تخطط و تشوف هتسيب الولاد فين و تعمل إيه فكر أنت إسعى إنك تبسطها فاجئها حتى لو بحاجه بسيطة.
خد الولاد يوم و قولها اخرجى مع أصحابك زورى عيلتك إعملى شوبنج إعملى شوبنج إعملى شوبنج الكلمة دى سحر على فكرة بتغير المووود تماما .
٥- إبتسم : أبوووووس إيديك كفاية نكد و الله عارفين حال البلد و الضغوط و المسؤليات بس حرام والله كده طول الوقت نقد او زعيق فى الولاد أو مكشر إلا طبعا لو جالك مكالمة من واحد صاحبك أو زيارة عائلية سبحان الله بتتحول لكوميديان رهيب فى لحظه معلش تعالى على نفسك و ابتسم فى البيت .
٦- تجمّل ليها : ده حقها عليك مش تفضل منك يعنى تلاقى الستات يا حبة عينى تطلع من ولادة تجرى تعمل رجيم و كل كام شهر لوك مختلف و قصة شعر و لون جديد لما شعرها وقع كله و ستايل لبس مختلف و لو تخنت ٢ ك تسمع من المنقى خيار !!!!
يعنى ليه بعد 7 – 8 سنين جواز تلاقى لبسك قلب على ستايل الخمسينات مع نظارتك و زهدك فى الدنيا ليه ها ليه ؟؟؟؟ ده غير لبسك فى البيت مش هنتكلم عنه ربنا ستار حليم.
و لو قالتك أنت تخنت يبقى أجرمت و خلاص أنت بتقنع نفسك أن ده أمر واقع طيب تخيل العكس كده و شوف أنت هتعمل ايه ؟؟؟؟ تعرف تتجمل لزوجتك شكلك رحتك لبسك يعنى زى ما نفسك تشوفها زى الممثلات هى كمان نفسها تشوفك زى الممثلين اه و الله و نفسها تشوفك كده لأنها بتحبك فعلا بتحبك و الحدق يفهم .
٧- لما تتعب و تعيا و تساعدها او تسندها بلاش تعمل ده و انت مش طايق نفسك و بتأفف تخيل لو للحظه إن إبنك او بنتك هما اللى مكانها ووقعوا فى التمرين و تعبانين و تخيل لهفتك و قلقك عليهم و تخيل و أنت واخدهم فى حضنك و تطبطب عليهم و ترقيهم تخيلت خلاص ! إرجع فكر أنت بتعمل إيه لما مراتك بتعيا ؟؟؟ على فكرة هى ممكن تكون كانت بتتألم بقالها كام يوم من وجع رهيب بس مش عايزة تقولك علشان عارفة رد فعلك هيوجعها أكتر من مرضها. أنت عارف هى كانت بتتعامل إزاى فى بيت أبوها!!! عارف لو كانت موجوعه دلوقتى كانوا هيبقوا موجوعين ازاى على وجعها و بيوفرولها كل سبل الراحة؟
٨- إفتخر بإنجازاتها و ما تقللش من أفكارها و شاركها اهتمامتها و ساعدها فى طموحها و حلمها و إنها توصل للأحسن.
٩- خلى دايما ليكوا طاعة تعملوها مع بعض قراءة قرآن أو صلة رحم أوغيره املى رصيدك عندها علشان لما تحتاج تسحب يكون عندك رصيد .
١٠- لما تنتقدها خدها فى حضنك و قولها أنا مش بصلح عيوبك أنا بصلح نفسى أنتى روحى و ما ينفعش تكونى بالجمال ده و يكون فيكى الحاجات الصغيره دى .
١١- زى ما تحب أنها تكرم أهلك و تحبهم إنت كمان حب أهلها و شرفها قدامهم .
١٢- اديها مصروف : مهما كان وضعها المادى عالى أو ميزانية البيت معاها إحساسها إنك بتفكر فيها و إنها فى حساباتك بيبسطها جدا بص هقولك الست كائن غريب و جميل يعنى زى ما بتحب تحس بشخصيتها و إنها مستقله بتحب تحس بضعفها قدام حبيبها بس . الست تحب تكون ليدى و هانم و تحب تتجنن و تكون طفلة الست ميكس كل حاجه و العكس!
١٣- خليك لماح : معلش دى برده صعبة على الرجالة بس كله بالتعود يعنى مش لازم تقولك الحاجة صراحة الست بتتكسف سواء لو بتنتقدك أو عاجبها حاجه فمعلش لما تقعد لوحدك اتعب نفسك و افتكر هى قالت ايه طيب تقصد ايه ؟؟؟ و حاول تعملهالها و الله هتلاقيها بتتنطط من الفرحة سواء غيرت الحاجه دى فى نفسك او اشترتلها الخاتم السوليتير اللى كل مره تروحوا المول تفرجهولك 🙂
١٤– الأيام اللى بتعدى مش هترجع تانى و كل مرحله بالرغم من ضغوطها إلا إنها ليها مميزاتها خلى ليك معاها دايما ذكريات حلوة علشان لما تواجههوا تحديات كبيره تصمدوا قدمها .
١٥– لو حبيت مراتك و أسعدتها زى ما هى عايزه صدقنى انت ريحت دماغك من نكد و زن و عصبية و الأهم كسبت حبيبة و أم و صديقة و زوجة و ابنة كسبت بيت من الجنه 🙂
يعنى خليك ناصح 🙂
تحية و تقدير و شكر و إجلال لكل زوج بيحاول يعمل لمراته حاجه تبسطها و يقدرها و تحيه أكبر للى بيحاول يوصل للأحسن فى علاقتهم و لكم فى رسول الله إسوة حسنة…
الكلام للزوجات المرة الجاية ان شاء الله لو كنت لسه عايشه إبقوا إسألوا عليا :))))
سارة مصطفي
مدربة تربية ايجابية معتمدة
مواضيع أخري اخترناها لك:
Photo credit: Bigstock
اترك تعليقاً
يجب أنت تكون مسجل الدخول لتضيف تعليقاً.