0
7.
إليكى سيدتى بعض النصائح والإرشادات اللى ممكن تساعدك تحافظى على حياتك مستقرة وفى نفس الوقت توازنى بين حقوقك وحقوقه .. فى ناس كتير هتقولك الاحترام والود والاستماع .. كل ده كلام حلو وكويس بس لازم تاخدي بالك من نقط تانية كمان لأنها ممكن تفرق معاكي كتير.
أولا : أهم حاجة اللى لازم تعرفيها كويس .. سعادتك مش مبنية على حد بعينه .. سعادتك مينفعش تبقى بس فى وجوده .. اه انتى بتحبيه وأكيد بتبقى أسعد انسانة فى الدنيا وهو معاكى بس لازم تتعودى أن سعادتكم نابعة منك انتى وتعرفى إزاى تبقى سعيدة فى عدم وجوده .. سعيدة فى شغلك أو فى خروجة مع اصحابك أو حتى وانتى فى البيت لوحدك تبقى سعيدة انك بتتفرجى على فيلمك المفضل , أغنية حلوة .. أنا عارفة ان بيبقى نفسك تشاركيه كل لحظة حلوة بس ده مش معناه ان فى عدم وجوده الدنيا تبقى غم .
ثانياً : البنت لما بتحب بتتشقلب كل الأولويات عندها وإذ فجأة يحتل حبيبها المرتبة الأولى فى حياتها وقبل ما تعمل أى حاجة تفكر فيه الأول هتضايقه هتبسطه هيكون ايه رد فعله .. فى حين أن 90% من الرجالة عمرهم ما هيحطوكى فى أول قائمة الاولويات ده لو عندهم اولويات اصلا .. وكمان أهم حاجة فى تصرفاتهم أنهم يكونوا راضيين عنها شخصياً الأول وبعد كده بتتساوى الأراء .. فيا ريت النقطة دى متضايقيكيش أو تأثر على علاقتكم عشان هما تركيبتهم كده .
ثالثاً : ممنوع البوز … الراجل عنده قناعة مترسخة أنه مهما كانت طبيعة عمله ومهما كان الست بتشتغل زيها زيه فهو بيتعب ويشقى عشان خاطرها .. وانه بعد كل التعب ده مينفعش يروح البيت يلاقى الست ضاربة بوزها .. طب اعبر عن شعورى إزاى؟ أعلق يافطة على صدرى مرسوم عليهاوش حزين؟؟ لا يا ستى .. يروح يلاقيكى فى أبهى صورك عادى ومبتسمة ومبسوطة ومحضراله الأكل سواء غدا أو عشا وبعد الأكل فى ساعة صفا تناقشيه فى الموضوع اللى مزعلك بثقة فى النفس وتبقى محضرة كلامك ومرتباه عشان متنفعليش وأهم حاجة تبقى واثقة من نفسك ومن سبب الزعل عشان لو حاجة هايفة هيقلب عليكى وساعتها هايقنعك وهيرضيكى بكلمة حلوة .. لكن لو اتناقشتى من غير تحضير كلام ومن غير هدوء هتنفعلى وصوتك هيعلى واحتمال تعيطى وينتهى الموضوع انه هو اللى هيزعل عشان إزاى تعلى صوتك عليه ولو اتبعتى نظام خلاص مخاصماه ومش هكلمه .. ياااه ده يبقى يوم الهنا يوم المنى ويوم ما تعاتبيه هيقولك هو انا اللى مش بكلمك انتى اللى مش بتتكلمى ( عندهم قدرة عجيبة على الأقناع).
رابعاً : متجيش على نفسك … طول الوقت يعنى , أكيد فى مواقف لازم تيجى فيها على نفسك بس قصدى مش طوول الوقت .. أدى لكل حاجة وقتها وأدى لنفسك وقتها .. ادى لنفسك يوم فى الأسبوع .. يومك الخاص .. متبذليش فيه اى مجهود .. حتى لو عندك أطفال يا تسيبيهم عن مامتك يا باباهم ياخدهم يفسحهم المهم ان يبقى عندك مساحتك .. بتحبى الكتابة اكتبى بتحبى القراية أقرى بتحبى الرقص ارقصى .. متعيشيش نفسك فى دور الضحية المقهورة اللى كله جاى عليها وعندهاش وقت لأى حاجة ولا لنفسها عشان هينتهى بيكى الحال كده .. ركزى .. هتلاقى فى وقت بيضيع فى تفاهات كتير .. هتلاقى ان الوقت اللى
انتى بتستهلكيه عشان تفكرى انتى ممكن تعملى ايه ممكن تعملى فيه حاجات كتير .
خامساً : أديله مساحته .. متقوليش هو لازم ينسى كل الناس بيا .. لو نسيتيه الناس على فكرة تبقى مش بتحبيه .. شجعيه يكون مع أصحابه ” ده لو هو مش متشجع أصلاً على آخره ” شجعيه يهتم بنفسه .. يروح نادى صحى , ينزل يتمشى , يشترى حاجة جديدة لنفسه , شجعيه يعمل حاجة بيحبها وحسسيه أد ايه انتى فرحانة بيها .. شجعيه يعمل خير .. شجعيه يزور أهله .. شجعيه يعمل حاجات حلوة وأكيد كله هيصب عندك فى الآخر .
نهير علي
[اقرئي أيضا: حتي يحبك زوجك...ابتعدي عن هذه الصفات]
[اقرئي أيضا: 10 طرق لايقاظ زوجك صباحا]
[اقرئي أيضا: كيف تحتفظين بمشاعر الحب مع شريك حياتك رغم مرور الوقت؟]
[اقرئي أيضا: حتي لا يصبح زوجك غريبا عنكم]
photo credit: bigstock
