بيت العز

share0254

            سالى بنت جميلة مثقفة خريجة هندسة هى الأخت الكبيرة وليها أخ و أخت أصغر منها، اتجوزت أيمن وهى عندها 23 سنة وهما بيحبوا بعض وعاشت أجمل أيام الخطوبة وكتب كتابهم، واختاروا الشقة والجهاز مع بعض وديكور الشقة والفستان والفرح، واتجوزوا ورجعت سالى من شهر العسل على بيتها لسه حاسة نفسها غريبة ومش واخدة عليه، وكل يوم أيمن يروح الشغل الصبح وهى تنزل معاه تروح لماما علشان ما تفضلش لوحدها وتزهأ، وييجى أيمن على مامت سالى يتغدوا هناك ويروحوا بالليل .

ولما يكون فى حد جاى يباركلهم ماما تروح لسالى من الصبح توضب معاها الدنيا وتجهز الحاجات الحلوة اللى هيقدموها للضيوف وتنزل ماما قبل ما الناس ييجوا .
ويمر شهرين وسالى تكون حامل وكل العيلة تتبسط، أول فترة حمل متعبة أوى .. دوخة وترجيع تقول لأيمن أنا مش قادرة وتعبانة أوى نروح نقعد عند ماما ويروحوا عند ماما شهرين، وأيمن يقولها خلاص عدت مرحلة التعب الأولى نروح بقي، ويروحوا وسالى حاسة بغربة شديدة فى بيتها وكل كام يوم تروح لماما تقعد عندها شويه وبعد كده بدأت تتقل والحمل يتعبها راحوا قعدوا عند ماما لحد الولادة .
سالى ولدت أول بنوتة وطبعا تعبانة من ألم القيصرى ومحتاسة بأول تجربة فى الأمومة، سالى قعدت عند ماما لحد ما ربعنت، وجات تروح وماما قلقانة عليها هى وليلى بنتها، وروحت و كل يوم تكلم ماما تعيط وتقولها أنا مش ملاحقة .. ليلى مش بتنام خالص وأنا مش عارفه امتى أنضف و أطبخ ومحتاسة.
ماما بقت تروح تساعد سالى كتير أو تبعتلها الغدا بتاع كذا يوم مع أخواتها، سالى فضلت فى بيتها شهر وراحت عند ماما أصل ليلى بتسنن وتعبانة وبتسخن من التطعيم.

كل شوية أيمن يقولها احنا بقينا نص لبسنا هنا ونصه عند ماما أنا عايز آخد راحتى فى بيتى وبدأت المشاكل،
كل لما سالى تروح بيتها تبدأ مرحلة جديدة مع ليلى ومش عارفة تسيطر على الأمور، لما ليلى بدأت تحبى أو عايزة تتطعم أو بدأت تمشى أو عيانة أوكل لما تحتاج مشوار تسيبها عند ماما .
ليلى كبرت شوية ومعظم الوقت سالى مقيمة فى بيت ماما وليلى علاقتها بتيتيتها أقوى من ماما، هى اللى بتعرف تأكلها وتشربها وتنيمها .

سالى بعد سنتين حملت تانى وكررت نفس التجربة واختارت حضانة لليلى جنب بيت ماما ومعظم الوقت ماما اللى بتوديها الحضانة والتمرين ولو سالى بتوديها لازم ماما تكون مجهزة الغدا .
وتمر الأيام وعدى على جواز سالى 6 سنين وليلى بقت عندها 5 سنين ويوسف عنده سنتين ..
أيمن خلاص فاض بيه و قالها مش كل واحدة بتتجوز بتقيم عند أهلها .. أنا مش براحتى، ولادنا مرتبطين بجدودهم أكتر مننا، كل الرولز اللى بنحطها بتبوظ هناك ..
أصلا هما بقوا ولاد مامتك وهى اللى شايلة مسؤليتنا وكأنها هى اللى اتجوزت جديد مش أنتى …
والخناقه كبرت أوى ونزل أيمن وساب البيت ….
سالى منهارة ومش عارفة تفكر وطلبت مننا نساعدها …..
هنساعد سالى وكل عروسة وأم جديدة ونقولها:

1. سالى حبيبتى أنتى اخترتى كل تفصيل فى رحلة بناء أسرة بمزاجك، من أول اختيار عريسك لحد بيتك وفرحك وخليتى كل اللى حواليكى يحترموا رغبتك وقولتى أنا خلاص كبرت و بقيت مسؤلة يبقى نشيل الشيلة كاملة، الباكيدج على بعضها كده هههه .

2. بيتك ده مملكتك حياتك لازم تخلى فى كل ركن فيه ذكرى حلوة ليكى أنتى وجوزك وولادك .. زى سهرة حلوة مع أيمن .. عزومة لأصحابكوا .. سهرة مع أخواتكوا ولمة شباب العيلة .. حفله لأصحاب ولادك، بيتك أنتى خلتيه (بيتى فترينة بدل بيتى مملكتى ) كان للزيارات بس .. القرايب ييجوا يباركوا ويتفرجوا على ديكور وجهاز وبس .

3. مقدرة أوى أن الحمل متعب وكل الستات بتحمل وتتعب لكن كان ممكن تصبرى وتسألى وتتعلمى من تجارب اللى قبلك وتفضلى فى بيتك تجهزيه لاستقبال أول فرحتكوا .

4. الولادة : يا ممهات يا جميلات احنا مش بنتفاجئ بالولادة احنا منتظرنها قبلها ب 9 شهور .. تكونى قرأتى واتعلمتى وحضرتى حاجات تفيدك فى الاستعداد للولادة .

5. طبيعى بعد ما تولدى ترتاحى فى بيت ماما أسبوع أو 10 أيام كفااااااااااية أوى مش لازم 40 يوم، كده عمرك ما هتعتمدى على نفسك .

6. لو كنتى ارتبطى ببيتك من الأول ماكنتيش هتحطى بيت ماما من الأول استبن لبيتك، وللأسف مع الوقت المعادلة اتقلبت .

7. مش كل تجربة جديدة ليكى مع ولادك لازم تكونى عند ماما، خوضى كل التجارب مع ولادك واستمتعى بيها بكل تفاصيلها من نجاح وفشل .. هى دى ذكريات عمرك وعمرهم.

8. ليه تحرمى نفسك من الاستمتاع بإنجازاتك حتى لو كانت بسيطة زى عزومة عملتيها لوحدك .. أو فطمتى ابنك .. أو بنتك حققت أنجاز فى رياضة أو دراسة ؟؟؟ دى أجمل لحظات حياتكوا .

9. جوزك عامل أساسى فى الوضع الحالى لأنه استسهل من الأول وما حاولش يساعدك، الحياة الزوجية مشاركة فى كل حاجة و أهمها الدعم النفسى لبعض .

10. اعتمادك على نفسك هيعلمك تنظمى وقتك بين بيتك وولادك و اهتمامك بجوزك وبنفسك.

11. سهل أنك تتحدى نفسك وتنجحيها قدام نفسك قبل أى حد وتتعلمى ازاى تستعدى لكل مرحله بطرق مختلفة، منظفة بيتى ومجهزة أكل فى الفريزر ومروقه دوالبيب وغيره .

12. الجد والجدة رسالتهم كآباء و أمهات خلصوها معانا على أكمل وجه، وجه دورهم مع أولادنا أنهم يستمتعوا بيهم وده هنناقشه تفصيليا الحلقة الجاية.

13. كل عروسة وكل أم جديدة المسؤلية ممكن تكون صعبة عليها لكنها ممتعة ومثيرة والتجارب هى اللى هتشكل تفكيرك وتثرى حياتك بالخبرات، بلاش تتضحى بكل ده خوفا من الفشل.

14. حتى لو فشلتى لا قدر الله دايما قولى لنفسك الفشل بداية النجاح وقومى تانى وكملى.

15. (لا يكلف الله نفسا إلا وسعها ) طالما ربنا اداكى النعم دى والمسؤلية دى يبقى هو عالم إنك قدها، بلاش تتخلى عن الثواب والمتعه دى .

16. خلى زيارتك لبيت أهلك وأهل جوزك عزيزة يعنى يستنوها ويوحشوكوا، ما تخليهمش مستنينكوا تروحوا علشان يرتاحوا شوية، استمتعى بمكالمتهم وكلها لهفة علشان يشوفوكى أنتى والولاد.

17. رسالة لكل أم عروسة : يسلموا ايديكى اللى ربت وكبّرت .. شكرا يا أجمل أم .. من النهاردة ارتاحى واتفرجى على ثمرة تعبك .. بنوتك كبرت وبأت عروسة وست بيت زى الفل سيبيها تخوض التجربة وتنجح زيك، اديها خبراتك بس بلاش تشتغلى بدالها .

18. سالى وكل أم عندك أقوى سلاحين الدعاء والاستغفار بجد بيهونوا كتييييير وربنا بيفرجها أوى أستعينى بالله هو خير معين.

سالى يا أجمل عروسه و أطيب أم بيت العيله دايما بيكون بيت العز جهزى بيتك يكون بيت العز لأولادك و أحفادك أستمتعى و أنتى بتزرعى الورد فى جنانين بيت العز

ملحوظة : ده نموذج من التهرب من المسؤلية ومش كل بنت فى بيت مامتها كده ولكل قاعدة شواذ .
منتظرة آراءكم
و أشوفكم على خير إن شاء الله .

بقلم : ساره مصطفى هاشم
مدربة معتمدة فى التربية الإيجابية من الولايات المتحدة الأمريكية