كيف تتعاملين مع الطفل الزنان؟

الزن الزن الزن .. كل حاجة أولادي عايزنها بالزن والإلحاح .. زن على كل حاجة طووووووووووووووووووووول الوقت ومبيفصلش
أنا تعبت ومش عارفة أعمل ايه ؟؟؟
دي مشكلة بتواجهها أمهات كتيرة مع أطفالها
طيب نحل المشكلة ازااي .. ده اللي هنعرفه مع بعضينا

في البداية كده خلينا نعرف مين هو الطفل الزنااااااااااااااااااااااااااان
الطفل الزنان : هو طفل عااادي جدا والظاهرة دي ظاهرة طبيعية فيه وممكن في بعض الحالات تدل على ذكاء الطفل الشديد أنه بستعمل الأسلوب ده عشان يعبر عن نفسه، وكمان الطفل الزنان طفل مثابر عنده إصرار على الوصول لهدفه .

المثابرة منه بتطلع على شكل الزن لأن الطفل لسه معندوش صبر وأنه مش فاهم كل الصح وكل الغلط ومش عارف يعني ايه الوقت المناسب، وقبل كل شئ هو لسه مش عنده القدرة اللي تخليه يُقدر ظروف الغير.

الطفل لحد 3 سنوات لا يُقدر شعور واحتياجات الآخرين الى حد كبير، كل اللي محتاجينه إننا نثبت على عدم الاستجابة للزن .أطفال كتير بيكون قدرتهم على الزن فائقة يعني يفضل يزن لحد ما يحصل على اللي هو عايزه، ودي حاجة بتخلي الأب والأم يصابوا بالجنون فبيعملوا حاجة من اتنين:

1. يعنفوا الطفل جدا جدا جدا

2.  يخضعوا لرغبة الطفل وللحاجة اللي هو عايزها

والأسلوبين دول غلط تماما ومش بيحلوا المشكلة بالعكس بيزودوها أكتر وبيسيبوا آثار سلبية تانية على شخصية الطفل، ومن خلالهم الطفل بيكتسب سلوكيات سلبية نعاني منها في المستقبل.

طيب ايه الاسباب اللي تخلي الطفل يلجأ للزن؟

1.  شعور الطفل بعدم الأمان

2. التدليل الزائد وإجابة طلباته دائماً

3. الشعور بالملل

4.  تقليد الآخرين

5. ممكن يكون جزء من تعبيره عن شخصيته المستقلة (طالما مش بشكل دائم أو لافت للنظر)

طيب هل الزن والإلحاح ده بيكون ليه أشكال مختلفة ؟؟
أكيد كل طفل بيختلف في أسلوب تعبيره حسب شخصيته وحسب الدافع وراء السلوك ده، يعني مثلا دي بعض الأمثلة على مشكلة الزن :

• العدوانية والغضب بالصراخ ويترمي على الارض أو يؤذي نفسه أو يضرب دماغه في الحيط

•  الشكوى الدائمة ومحاولة جلب تعاطف الاخرين وشفقة الاخرين دايما

• الإلحاح للحصول على ما يوجد أمامه

• الإلحاح للحصول على أشياء بعينها

•  التمادي في الإلحاح أمام الأخرين على وجه الخصوص وهكذا

طيب الطفل الزنان والملح ده نتعامل معاه ازااااااااااااااااااااااي ؟؟؟

1. حاولي تلفتي انتباه الطفل لأي حاجة تانية

2. حطي قواعد بالنسبة لطلبات الطفل .. حددي ساعات في اليوم للعب على الكمبيوتر أو الكرتون، حددي أيام لشراء الحلوى .. لأن الطفل حتى لو تمرد على القواعد فهومحتاج لها عشان بتحسسه بالأمان بس هو بيتحداها عشان يختبر قوتها.

3. اتفقي مع ابنك على عقاب إذا بكي أو ألح في شئ من غير معاده، وكمان الاتفاق مع الاخرين المشاركين في رعاية الطفل عشان ميتهدش اللي بتبنيه .

4.  خلي بالك في جوانب إيجابية في السلوك ده ممكن يكون بيعكس مهارة في القيادة والقدرة على التعبير عن النفس وعدم الانسياق للآخرين بسهولة وغيرها من المهارات، وعشان كده في المقابل على الأب والأم توظيف الطاقات والصفات دي بشكل إيجابي بدل من كسر إرادته، ممكن نوليه مسئوليات معينة تناسب قدراته وسنه، أو نعلم الطفل ازاي يعبر عن رأيه ومشاعره وطلباته بطريقة مهذبة .

5.  نبعد تماما عن الضرب لأن العنف مش هيحل المشكلة .

6.  ابعدي عن أسلوب “هو كده ” لأنه هيخلي فيه صراع على السلطة أكثر بينكم .

7.  ابعدي عن التحكم الزائد في طفلك وعدم إعطائه قدرة على الاختيار أو التعبير عن نفسه

8.  ابعدي تماما عن إجابة طلبه لحد ما يطلب بالشكل المناسب وبالنبرة المهذبة

9.  ملامح وجهك ونظراتك وحركات جسمك لازم تعكس الحزم والإصرار وأنك مش هتتراجعي عن موقفك في عدم إجابة طلبة لحد ما يتكلم بالأسلوب المناسب.

10.  عشان تثبتي على موقفك متحطيش في حسابك كلام الاخرين ومدى اقتناعهم بطريقة تربيتك لابنك، اعملي اللي انتي شيفاه صح، أنتي مش محتاجة أنك تثبتي للناس حبك وكرمك مع أطفالك .

11.  خليكي قدوة لأطفالك في طريقة عرض طلباتك .

12.  شجعي ابنك لما يطلب بشكل لائق ومهذب

13.  في وسط ثورة الطفل تجنبي التعبير عن تفهمك لمشاعره أو محاولة توجيه لأنه هيفهم إنك بتنكري مشاعره وبالتالي هيحاول توصيلها بشكل أكثر قوة أو هيلاقي أن سلوكه يجذب الانتباه اللي هو عايزه فهيستمر في سلوكه غير المقبول، استني لحد ما يهدأ وبعدين اتكلمي معاه .

14.  اوعي تقولي لطفلك انت قليل الأدب لما يتكلم بطريقة غير لائقة، قوليله أنا متوقعة منك تتكلم بالشكل الفلاني ” أنا متوقعة أنك تقولي من فضلك يا ماما” بدل ما أقوله متتكلمش بصوت عالي .

15.  اوعي تخضعي لإلحاحه عشان تتخلصي من الزن لأنك بكده بتدعمي السلوك مش بتعالجيه

16.  خليكي عارفة انك بتغير اسلوبك في التعامل مع طفلك أن الطفل هيزيد في السلوك السيئ قبل التحسن كل اللي عليكي هو الثبات لأن الطفل بيتخبر قوة الحدود الجديدة .

الإلحاح أسلوب مستفز لكن عليكي في تربيتك لأبنائك أن تكوني الفعل لا رد الفعل، أنتِ الأنضج وهذا يتطلب منكِ الصبر، وفقك الله في تربية أطفالك .

ا/ سمية عصام إبراهيم
أخصائية العلاج سلوكي- ومدربة بناء شخصية واستشاري تربوي